Día 23 de outubro de 2023 ás 11:00, biblioteca de Escairón

Celebramos a Semana das Bibliotecas coa actividade do programa Ler conta moito…

Atrévete a facer o teu propio conto

da man de Estefanía Padullés

o 23 de outubro, ás 11:00 na biblioteca

Co alumnado da ESO do colexio de Escairón, logo dunha breve presentación sobre quen escribe ou ilustra un libro, pasamos a ver uns exemplos do traballo de Estefanía.

Despois vimos unha pequena mostra variada de libros de banda deseñada de distintas épocas, temáticas e estilos e como se asemellan a unha película.

Soubemos por que uns mangas están en branco e negro, e outros en cor.

Vimos como se recrea o movemento nun debuxo, ou como un debuxo insinúa cousas só porque é máis grande ca outro nunha páxina de banda deseñada. Vimos diferentes perspectivas e outros truquiños de ilustración.

Seguindo as directrices da autora, e coa introdución A noite caera sobre as ruínas,… unha noite fría e chuviosa. Achegábase a tormenta empezamos a planificar e deseñar a nosa primeira páxina de banda deseñada.

Só cunha folla en branco e un lapis, descubrimos múltiples escenarios ruinosos.

Acabou facéndosenos curto, pero cando teñamos rematadas as nosas páxinas, poderemos expoñelas na biblioteca!

Ademais coñecemos algúns dos materiais da sección de banda deseñada que temos na biblioteca, e que se pode consultar no catálogo da Rede de Bibliotecas de Galicia [consulta aquí os libros da Comicteca] e tamén os libros de Estefanía Padullés.

A biblioteca municipal Xabier P. Docampo ofreceu, este venres, unha interesante sesión da actividade ‘Fai o teu comic!’, da man de Iria, ilustradora e deseñadora gráfica.

Ler máis →

Non pode arrancar de mellor xeito o XX aniversario do noso Festival de cómic Viñetas desde o Atlántico que poñendo en contexto a banda deseñada galega, as súas orixes e a súa evolución ata o día de hoxe. E é por iso que programamos na Biblioteca Os Rosales a charla con Xulio Carballo: “Ler a nosa BD! Unha viaxe pola historia e os autores da Banda Deseñada Galega”.

O luns 7 de agosto ás 18 h coñecimos as orixes da banda deseñada galega da man de Xulio Carballo e ata o domingo 13 de agosto poderemos disfrutar na cidade da Coruña do Festival Viñetas desde o Atlántico, que lle dedica unha exposición especial aos autores galegos convidados ao longo destes vinte anos de historia.

Neste obradoiro práctico creamos viñetas e memes partindo de imaxes e novas de actualidade. Coñecimos as técnicas, estratexias e ferramentas contemporáneas para crear e compartir humor gráfico. E xa comprobamos da man de Guitián que non é necesario debuxar ben, só ter un chisco de inxenio ou sentido do humor (ou nin eso).

O afamado viñetista Santy Gutiérrez, recoñecido polas súas divertidas e ácidas viñetas diarias no xornal “La opinión de A Coruña“, estivo na Biblioteca Forum Metropolitano da Coruña para facernos partícipes de cales son as pautas básicas para debuxar un cómic. O Obradoiro, dirixido a rapaces de 7 a 15 anos, forma parte das actividades de Ler Conta Moito, programa de dinamización da Rede de Bibliotecas de Galicia.

  Este luns 8 de agosto tivemos na biblioteca municipal Sagrada Familia o pracer de contar co ilusrador Xosé Tomás que impartiu o  Obradoiro de banda deseñada Coñécete a través dos cuadriños

As persoas asistentes crearon durante dúas horas persoaxes baseados no seu entorno, inventando guións sobre a súa vida e contando a súa propia historia entre as viñetas.

A Biblioteca Municipal Forum Metropolitano acolleu un taller de iniciación ao Manga este xoves 20 de Agosto ás 11:30 h. Esta actividade forma parte do programa de dinamización lectora da Rede de Bibliotecas de Galicia, Ler conta moito. Estaba dirixida a mozos/as a partir dos 9 anos e impartiuno o estudo especializado en manga “Cerditos de Guinea”.
Traballamos nos pasos básicos e conceptos principais do manga e nas técnicas e materiais usados polos profesionais xaponeses.

O pasado venres 25 de abril  na Biblioteca Municipal de Cambados dixemos ata pronto á profesora de debuxo Ana, que se achegou á Casa dos Fraga para darnos a coñecer a historia e técnicas creativas da banda deseñada.  O taller de Oink! (creadores da revista do Xabarín Club) realizouse grazas a “Ler Conta Moito” e  enmarcábase dentro do programa de actividades “Abril… libros mil!” que o Concello de Cambados soe realizar neste mes para dinamizar a lectura e estender a celebración do Día Internacional do Libro Infantil e Xuvenil e o Día do Libro a todo o mes.

A actividade realizouse os venres 4, 11 e 25  de abril e participaron o máximo de rapaces permitido, resultando todo un éxito. Todos elaboraron a súa propia banda deseñada e foron moitos os que destacaron pola súa orixinalidade e bo facer… sen dúbida repetiremos!

Os participantes do Oboradoir de Banda Deseñada con Xosé Tomás

Interesantes obradoiro no que os participantes crearon perxoases baseados no seu contorno. Incluso inventaron algúns guións!!