O pasado venres 15 de maio, a Biblioteca Casa dos Fraga en Cambados contou coa compañía Matapiollos para gozar dunha solleira tarde no xardín e celebrar por adiantado o día das Nosas Letras.

Coñecemos a uns bibliotecarios un tanto curiosos, un deles mesmo un pouco torpe, que andaba detrás duns misteriosos “Comelibros” para darlles captura…aínda que lle foi misión imposible!

Andade con coidado non vaian a colarse nas vosas bibliotecas!

O pasado sábado 9 de maio, dentro dos actos programados para a celebración das Letras Galegas, a biblioteca Casa dos Fraga programou unha fermosa contada moi especial da man de Migallas e os seus Contos do chupete, para os socios máis pequerrechos da biblioteca municipal.

Ao ritmo de “Samba samba leré…” ou “Pachín pachán pachón… a gabaranciño non pisedes”  e mesmo “Os sapatos piden medias… as medias piden sapatos”… acabamos todos, grandes e pequenos, cantando no xardín da biblioteca… sen dúbida foi unha mañá de conto!

O pasado sábado 18 de outubro, Cambados celebrou por todo o alto o 4º aniversario das novas instalacións da súa biblioteca municipal, na Casa dos Fraga. Grazas ao programa de animación á lectura Ler conta moito puidemos gozar do bo facer de Migallas Teatro.

O Concello de Cambados quería agradecer así  un ano máis a todos os seus socios e usuarios a súa asiduidade e amor pola lectura. Sobre todo, querían facelo cos máis implicados, os nenos e nenas do municipio…e a resposta non puido ser mellor!

Asistiron máis de 70 pais e rapaces ao espectáculo “Merenda con pan de millo”. Baseado no Libro-disco Pan de millo, editado pola Editorial Kalandraka , os asistentes puideron divertirse coas cancións, co proceso de elaboración do pan de millo como fío condutor. Os temas musicais que se interpretaron foron: “Pinocho”, Pan de millo, O piollo e a pulga “Unha vella tiña un can”, “Que cousa, cousiña é?” e “Miña Abuela Manuela”.

Sen dúbida a celebración foi todo un éxito!

Na Casa dos Fraga en Cambados, o pasado sábado 3 demos a benvida ao mes de maio cunha fermosa sesión de bebeteca da man  da experimentada contadora de historias Charo Pita.

Grazas ao programa Ler conta moito palabras, trabalinguas, historias, algún silencio, libros, xogos co corpo, cancións arrolantes, sons sorprendentes, e todo un triquitraque (ou un traquetriqui) deixáronse sentir na biblioteca, para que os que dormen no berce tamén puidesen gozar coas historias no colo daquelas (e daqueles) que ben os queren… e vaia se así foi!

Cubríronse o total de prazas dispoñibles e a actividade resultou todo un éxito que, de seguro, volveremos a repetir!

O pasado venres 25 de abril  na Biblioteca Municipal de Cambados dixemos ata pronto á profesora de debuxo Ana, que se achegou á Casa dos Fraga para darnos a coñecer a historia e técnicas creativas da banda deseñada.  O taller de Oink! (creadores da revista do Xabarín Club) realizouse grazas a “Ler Conta Moito” e  enmarcábase dentro do programa de actividades “Abril… libros mil!” que o Concello de Cambados soe realizar neste mes para dinamizar a lectura e estender a celebración do Día Internacional do Libro Infantil e Xuvenil e o Día do Libro a todo o mes.

A actividade realizouse os venres 4, 11 e 25  de abril e participaron o máximo de rapaces permitido, resultando todo un éxito. Todos elaboraron a súa propia banda deseñada e foron moitos os que destacaron pola súa orixinalidade e bo facer… sen dúbida repetiremos!

O pasado venres, a biblioteca municipal Casa dos Fraga de Cambados recibíu a visita de Alicia, da man dos Títeres Cachirulo.

Durante unha hora os pequenos e familias que alí se achegaron puideron gozar das aventuras de Alicia no país das marabillas e os seus encontros con personaxes tan disparatadas como o coelliño branco, a raíña de corazóns, a eiruga verde etc.

Durante este mes de outubro estendemos a varias xornadas a celebración do Día das Bibliotecas.

Títeres Cachirulo na Casa dos Fraga en Cambados

Grazas ao programa Ler conta moito, ademais dos Titeres Cachirulo, poderemos gozar o vindeiro venres de Aldaolado e a súa música a través do seu espectáculo “Con dez poemas por barba”…estades todos convidados!