O 25 de abril na Biblioteca de Portonovo, celebramos o Día Internacional do Libro Infantil e Xuvenil coa actividade “Calendario de Contos”.

A sesión a cargo de Sole Felloza, achegou ós cativos de Portonovo unha marabillosa tarde de contos arredor do calendario. Todos xuntos cantaron, incluídos os país, nais e avoas, e pasaronno xenial. De feito houbo cativos que xa na casa seguían a cantar as melodías que Sole lles ensinara. E ó rematar, un cativo achegóuse para que Sole lle adicase o seu libro.

Foi un pracer contar con esta narradora e disfrutar das súas historias e a súa profesionalidade. Tanto os maiores coma os pequenos disfrutaron do lindo, de tal xeito que, cando Sole terminou ninguén se moveu do sitio: estaban tan metidos na sesión que querían máis…

Ata pronto Sole!

Para celebrar o Día do Libro, Martín Camiña rodeou a nosa biblioteca de maxia e humor. A través de trucos de maxia con cordas, cartas e outros elementos clásicos vertebrouse un espectáculo onde sempre estivo presente o libro como gran protagonista

Día do Libro na Biblioteca Pública da Coruña Miguel González Garcés co Espectáculo de Migallas “Camiño de Historias” . Historias tradicionais, historias de rapaces consentidos polos país, historias de rapaces pedichóns, historias do ciclo da vida e da importancia da música e da festa. Historias co fin de difundir a literatura popular infantil de Galicia. 76 nenos e nenas estiveron   ansiosos, entusiasmados e felices de participar do espectáculo familiar de Migallas Teatro.

A Xanela Ocio despedíronse de Cambados o pasado venres 24 de abril, tras ter visitado as catro axencias de lectura do municipio. A última en gozar das súas divertidas historias foi a nosa ALM de Castrelo que puido celebrar entre sorrisos o Día do Libro.

Tras a súa visita aos nenos de Oubiña e Vilariño, onte chegoulle o turno aos socios da ALM de Corvillón, que xunto coas divertidas historias de Xanela Ocio, puideron celebrar por todo o alto O Día do Libro, grazas ao programa Ler Conta Moito!

O pasado venres 25 de abril, Títeres Cachirulo rematou a súa particular maratón de animación á lectura por Cambados, grazas ao programa Ler Conta Moito.  Así levou a todas as axencias de lectura das parroquias o seu espectáculo “O libro da selva” co cal os rapaces e familiares puideron gozar das aventuras de Mowgli e os seus amigos.

Nesta última función asistiron máis de 60 persoas, resultando todo un éxito de participación.

Os rapaces ademais, ao remate da sesión de títeres, puideron tocalos e xogar con eles… sen dúbida pasamos todos unha celebración do Día do Libro fantástica!

Ca ratiña Carolina de Lonxedetodo disfrutamos e saboreamos os seus contos e receitas para pasar un bo rato cos nenos e nenas que se achegaron cas súas familias a deleitarse nas boas historias. Con TrinkeTrinke Teatro está asegurado o humor e a boa animación á lectura que ao final nos trae usuarios e lectores a nos a Biblioteca Municipal de Fene.

Na Biblioteca quixemos celebrar o Día do Libro, entre outras actividades, cos cativos do concello, xa que debemos comezar a fomentar a lectura desde idades tempranas. Para iso contamos coa presenza de Pablo Díaz que lles ensinou o son e formas de diferentes instrumentos, contou historias ben bonitas como a dun rato que viaxa ata a lúa, e ensinounos as cores grazas a un crocodilo.

Tarde de música e contiños para os mais cativos.

O pasado martes 22 de abril, Títeres Cachirulo visitou a ALM de Corvillón, dentro dos actos organizados para celebrar o Día do Libro.

O Concello de Cambados, grazas ao programa da Xunta de Galicia Ler Conta Moito, puido estender dita celebración a todas as parroquias, para dun xeito lúdico, difundir a lectura e os libros. Os nenos e familiares que asistiron, arredor de 30, puideron coñecer a historia de Mowgli e as súas aventuras e desventuras na selva.