O pasado venres e para pechar as actividades do Programa de Voluntariado na Biblioteca Ágora de A Coruña recibimos a Silvia Penide -voz e presentacións- e Carla López -piano e voz- co seu espectáculo FemininoPlural. Asistiron 54 persoas entre voluntari@s e usuari@s dos nosos programas de formación permanente de persoas adultas: Alfabetización, Hora de Lectura e Lectura fácil. Un percorrido  polas cancións escritas por mulleres que puidemos seguir e cantar coas artistas nun encontro emocionante e totalmente adaptado aos asistentes que gozaron das letras e a música de Mari Trini, Amaral, Violeta Parra…

FemininoPlural

Na Biblioteca Ágora da Coruña tivo lugar a Xornada Leobén: Biblioteca e Competencia Lectora, na que o tema principal foi o achegamento á lectura a todas as persoas, as dificultades no aprendizaxe da lectura e os recursos para a súa promoción, tanto físicos como virtuais, temas dos que nos falaron dous profesores da Universidade . Dende a Asociación Galega de Dislexia explicaron cales son os principais problemas aos que se enfronta a infancia con dislexia na escola e na familia e despois tivo lugar unha mesa redonda na que se falou dos diversos camiños que levan á lectura: a lingua de signos para as persoas xordas, o Braille para as persoas cegas, a importancia dos apoios visuais e os pictogramas para as persoas con discapacidade intelectual e do funcionamento dos clubes de lectura fácil. Houbo tamén unha parte práctica, cun obradoiro a cargo de ANHIDA e o seu can Seven, ademáis da intervención das bibliotecarias contando contos con apoio visual e musical que gustou moito aos máis de 52 participantes, que viñan fundamentalmente dos centros de formación en Educación Infantil e Animación Sociocultural. Pola súa banda, 85 nenos/as e persoas de diversas entidades e centros de ensino asistiron  ao espectáculo máxico de  Chrystyan Magic celebrado no medio da Xornada.

Na Biblioteca Ágora, para celebrar as LETRAS GALEGAS, unímonos ao Grupo Dado , que é a rede de clubs de lectura dos IES da Coruña Monte das Moas, Elviña, Ramón Menéndez Pidal, Rafael Dieste e Agra I, convocando un concurso de microrrelatos entre o alumnado e facendo coincidir a presentación e lectura dos mesmos coa entrega dos premios nas súas diversas categorías.  Buscamos unha atividade didáctica ao tempo que dinámica e diferente que gustou pola súa variedade e calidade:  Un paseo pola música negra. Soul e literatura, de Iria Mejuto, xunto a un gran pianista, Iago Mouriño, trouxo ao auditorio do Ágora temas actuais e coñecidos polas persoas asistentes.

A estupenda actuación do grupo musical Xardín Desordenado tivo lugar no marco da celebración do Dia das Letras Galegas e da colaboración da Biblioteca Municipal Ágora da Coruña co grupo Dado, que engloba aos clubes de lectura de varios centros de ensino secundario da cidade. Máis de 250 rapaces/zas e  os/as seus/súas profesores/as xuntáronse para escoitar as cancións de tres dos compoñentes deste grupo  especializado na poesía galega. As voces de Marlene e Santiago, a magnífica guitarra de Isaac Garabatos,  e as intervencións de Santiago  Ferragud, fiando textos, destacando os elementos fundamentais dos poemas, fixéronse  cun auditorio que gozou da música da palabra e da poesía que explica, reivindica e serve para emocionar e comunicar.  Elixiron poemas de Manuel María, por suposto, pero tamén de Fernán Vello, Xosé Cáccamo, Olga Novo, Carmen Kruckenberg…  Tralo concierto, gala de entrega aos premios do concurso de videos de recomendacións de lectura feitos polos/as alumnos/as.

Xurxo Souto cunha adaptación do seu espectáculo Océano para Terrícolas pechou na Biblioteca Municipal Ágora de A Coruña unha actividade de colaboración de varias sesións entre o colectivo da UDC 1AUN máis a Asociación de Veciños Loureiro de Visma e o CEIP San Pedro de Visma que serviu para coñecer mellor a historia, toponimia, sons e evolución do barrio no que viven.

Encontro coa literatura brasileira

Co motivo das celebracións do Día Internacional do Libro Infantil e Xuvenil dedicado a Monteiro Lobato e específicamente á literatura do Brasil, Felipe Díaz e a Trastenda dos Contos adaptou unha proposta en relación á literatura portuguesa e/ou autores brasileiros premiados co Hans Christian Andersen para o tramo de idade de 9 a 13 anos.

O pasado 14 de maio na Biblioteca Ágora celebramos dunha forma especial o Día das Letras Galegas, data simbólica na que poñemos en valor como pobo o feito de contarmos cunha identidade, cultura e lingua propia. A forma escollida desta volta foi unha sesión de narración oral que desenvolveu Avelino González para os nenos e nenas de 6º de EP do CEIP San Pedro de Visma.

O recoñecido actor galego de teatro, cinema e televisión conseguiu captar toda a atención dos asistentes coas súas historias dramatizadas, cun pé no real e outro no ficcionado. Para alén da súa capacidade de envolver con palabras aos mozos e mozas, quixo tamén facelos partícipes das historias interaccionando con eles en diversos momentos da sesión.

A actividade resultou un verdadeiro éxito, tanto polo dinamismo e viveza coa que se desenvolveu como pola propia valoración dos alumnos e alumnas asistentes.

O pasado venres 27 de marzo tivemos na Biblioteca Ágora unha actividade coa que quixemos celebrar o Día Internacional da Literatura Infantil e Xuvenil, e para o cal aproveitamos tamén as oportunidades que ofrece o programa Ler Conta Moito.

70 nenos e nenas, dos centros educativos CEIP Raquel Camacho e CEE Nuestra Señora de Lourdes – Aspronaga, foron protagonistas dunha xornada na que por un lado desenvolveron a proposta Ti tes moito conto!, organizada desde a Biblioteca coa súa colaboración, e por outro asistiron á actuación de Inácio, que nos deleitou cos seus contos do demo e coa contada da Nau Catrineta.

Con Ti tes moito conto!  buscamos traballar en dous aspectos que cremos de interese para os hábitos do alumnado participante: dun lado o fomento da lectura a través do coñecemento lúdico de contos e historias clásicas ou de tradición popular; doutro, a colaboración e o traballo en equipo entre alumnos e alumnas de centros diferentes e de realidades que non son as que viven a diario.

Como diciamos, a actuación de Inácio foi un fin de festa estupendo para a actividade final que preparamos o pasado día 27. A súa capacidade de interacción cos nenos e nenas, o carácter acumulativo das historias relatadas -que facilitaba a participación activa nas mesmas- e o propio interese do contido fixo que todos e todas gozaramos dunha sesión ben divertida e proveitosa.

Obradoiro impartido polo debuxante MANEL CRÁNEO.

Destinado a nenos e nenas de 6 a 10 anos.
Lectura de dous libros do Diario de Pichük con ambiente sonoro en directo. Buscouse  aprender e practicar a creación de personaxes e mundos imaxinarios a través do debuxo e as palabras. Fabricáronse  chapas que cada neno/a levou para a casa.

O pasado 16 de maio tivemos na Biblioteca Municipal Ágora da Coruña a ocasión de achegarnos novamente á poesía e á música de Aldaolado, o estupendo proxecto que as poetas María Lado e Lucía Aldao levan anos desenvolvendo, ao vivo, polo conxunto da xeografía galega. Na posta en escea, lúdica e divertida, desfrutamos dos versos de diferentes autores e autoras do país, dos das propias protagonistas do recital e da forma especial e fermosa na que a música da Velvet Underground, David Bowie e outros clásicos -fantástica versión de Rocío Jurado en galego, incluída!- dialoga cos recitados.

Por pouco habitual, por cercano ao público e pola vontade de desacralizar o texto literario e a propia condición de poeta, o formato que ofrecen as creadoras do espectáculo resulta especialmente interesante. Nelas están os xogos e as citas ás referencias da cultura popular de masas, coas que medramos e coas que convivimos. Nelas, tamén, a espontaneidade, a naturalidade e a frescura coa que se relacionan,  desde o gozo, desde o pracer, cos propios poemas, cun sentido lúdico que non por iso lles resta intensidade e verdade á fondura dos textos.

O desenvolvemento da actividade na Biblioteca volveu demostrar a solvencia na posta en escea e a capacidade de conexión de Aldaolado coas e cos asistentes, para unha franxa de idade, ademais, ampla e capaz de conectar con adolescentes, adultos ou persoas maiores por igual.