O venres 17 gozamos cos Contos do Chupete de Bea Campos e Davide González nunha nova sesión do ciclo Entre Arrolos e Contiños.

Nesta ocasión visitáronnos dúas amigas moi especiais: unhas galiñas de Mos moi curriñas, e cunhas co-co-co-convidadas como elas, entre os contiños da tarde non podía faltar o do Poliño da abeleira, do grande Antonio Rubio. Visitamos tamén a casa das galiñas, unha granxa na que chove pero escampa, e na que viven con moitos outros animais que tamén fomos coñecendo. O máis famoso de todos, o Polo Pepe, de Nick Denchifield, na versíón musicada de Mamá Cabra.

Indo a cousa de galos e galiñas, non nos podíamos esquecer da cantiga tradicional: O galo canta, a galiña chora, polos pitiños de durmen fóra… E xa que estabamos entonados, cantamos tamén a historia da galiña Antoniña, que puxo un ovo na cociña, e o ovo rodou, e o ovo escachou… e o pito cantou!

E para rematar a sesión, e xa que ás galiñas de Mos gústalles facer falcatruadas e diabluras, despedímonos ao son do Sancristán de Coímbra:

O Sancristán de Coímbra
facía de mil diabluras:
mollaba o pan en aceite,
deixaba os santos a escuras…

Dentro do programa Ler Conta Moito promovido pola Xunta de Galicia, o sábado 21 de xuño Bea Campos e David Fernández acompañáronnos na última sesión de  Entre arrolos e contiños – Os contos do Chupete deste curso.

 Foi como sempre unha fantástica mañá de animados contos e cancións que fixeron as delicias de pequenos e maiores.

 

Comezamos, para non perder o costume, coa canción de benvida seguido dun conto tradicional e ben coñecido por todos, o Garavanciño. Despois de seguir as súas peripecias ata acabar na barriga do boi, fomos de paseo ao Zoo, onde coñecimos a simpáticos animais como a curuxa Paca, o rato Xan, o panda Andrés… E como a cousa ía de animais, seguimos a sesión con outro clásico: os Tres porquiños. Acompañamos tamén ao pequeno Iyoqué, que a pesar de non ser alto como a súa amiga a xirafa, nin forte como o gorila, feroz como o león ou áxil como a gacela, está moi contento de ser todavía pequerrecho, pois así ten a sorte de caber no colo da súa mamá…

 

 

Para rematar, fixémolo como xa é habitual con dúas cancións populares, que nos meteron o ritmo no corpo para toda a fin de semana.

Deixámosvos o enlace ao álbum da biblioteca onde podedes ver os mellores momentos da sesión!

O sábado 24 celebramos na biblioteca unha nova mañá Entre arrolos e contiños na compaña de Bea Campos e David Fernández e os seus Contos do chupete.

 

Foi unha mañá chea de novidades literarias, pois presentáronnos novos contos recén saídiños do forno! Así, aprendimos as cores da man dos ratiños de Leo Lionni, ou cantamos as rimas de Antonio Rubio en Zapato, Piñeiro e Violín. Non faltaron tampouco clásicos como O poliño da abeleira, nin a música do acordeón ou a ocarina para acompañar estes fantásticos contos.

 

 

Despedímonos como de costume cunha preciosa canción tradicional, o alecrín:

Alecrín, alecrín dourado 

que naceu no monte 

sen ser sementado.

Ai amor, amor

¿quen che dixo a ti

que a flor do toxo

era o alecrín?

 

Como sempre, todas as fotos da sesión están á vosa disposición no álbum da biblioteca Xosé Neira Vilas.

 

Entre arrolos e contiños. Os contos do Chupete

Próxima sesión: sábado 21 de xuño de 2014

*Inscrición: a partir do 2 de xuño ás 17.00h

O pasado sábado tivemos unha nova cita con Bea Campos e David Fernández, que nos trouxeron os seus Contos do Chupete.

 

Despois de cantar o “Arrorró”, a nosa canción de benvida, fomos perseguindo ao ritmo da música do acordeón ao noso amigo Frederick, que estaba agochado nos máis insospeitados lugares: nun zapato, nunha cova, no medio da herba, nunha botella… Tamén recordamos a historia dos Sete Cabritiños e o Lobo, e fomos testemuñas de como unha verdadeira princesa non é capaz de durmir nunha cama na que baixo 20 colchós hai agochado un minúsculo chícharo…

 

Rematamos a sesión como sempre con música, primeiro seguindo os pasos de Catarina e o Oso polo mundo, primeiro a dúas patas, despois a tres, a catro… E puxemos punto e final cunha canción tradicional, neste caso de Portugal: así, ao ritomo do Galo Loiro despedímonos ata a seguinte sesión.

 

Tedes todas as fotos desta mañá Entre arrolos e contiños no álbum da Biblioteca Neira Vilas.

 

 

Entre arrolos e contiños. Os contos do chupete

Próxima sesión: sábado 24 de maio ás 12.00h

*Inscrición: a partir do 2 de maio ás 10.30h

Este sábado Bea Campos e David, de Migallas Teatro, fixéronnos pasar unha mañá do máis divertida e aventureira na biblioteca Neira Vilas de Vigo.

 

 Antes de comezar a sesión os nosos amigos agasalláronnos coas flores de San Xoán, amosáronnos como se chaman e como  cheiran.

 

 

E como os nenos que veñen a biblioteca son uns nenos moi valentes fomos tras unha nova aventura…fomos cazar un oso! Pero non un oso calquera senón un oso terrible e perigoso. Toda unha aventura que nos narra o humorista e escritor Michael Rosen no seu álbum “Imos cazar un oso” e que interpretaron Bea e David fantasticamente.

 

Continuamos a nosa aventura co conto do neno que non facía caso ao seu pai e metía o dedo no seu nariz e no de todos os animais que atopaba no seu camiño.

 

Rematamos a sesión coa canción de Despedida de Arrolos e cun agasallo moi especial…A canción de San Xoán para que todos a cantemos na noite máis máxica do ano.

 

 Entre arrolos e contiños

Próxima sesión: Sábado 21 de setembro ás 12.00h