O pasado sábado 21 Gloria Mosquera e Diego Maceiras visitaron a nosa biblioteca das Pontes. Cociñáronnos una morea de historias saborosas e musicais que nos prestaron moito. Moitas grazas por agasallarnos cos vosos Contos para un mundo mellor

Onte venres 20 Elefante Elegante visitou As Pontes co seu contacontos Lobo Bobo. Os rapaces e rapazas pontesas pasarono estupendo cos seus contos

Onte, martes 18, Magín Blanco visitou As Pontes. Aproveitando o verán sacamos a biblioteca ao parque e entre libros desfrutamos da actuación do cantante co seu Letras e notas. Os nenos e nenas pontesas pasárono en grande. Cantaron, bailaron e acertaron adiviñas xogando coas letras e coa música. Grazas Magín, foi un pracer a túa visita.

Os nenos e nenas das Pontes achegáronse á biblioteca que estes días das festas patronais trasládase ao aire libre para desfrutar do Conto express de Sarabela. Grazas Nate e Flor polo ben que nolo fixéchedes pasar.

O pasado xoves 25 de maio, Cris de Caldas contoulles aos nenos e nenas das Pontes as historias que para eles escribiu Carlos Casares. Falounos de Lolo, de Toribio, pero sobre todo contounos con gran detalle a histora de A Galiña Azul. Os rapaces pasárono en grande e puideron levarse para a casa un marcapáxinas que, axudados por Cris, fixeron coa imaxe da galiña azul. Foi unha bonita forma de completar as actividades que co gallo destas Letras Galegas 2017, a biblioteca Enrique Rivera Rouco está a realizar na honra de Carlos Casares.

Biblioteca Máxica

O pasado 30 de marzo a Biblioteca Enrique Rivera Rouco nas Pontes de García Rodríguez celebrou por adiantado o Día do Libro Infantil con Payasopiruleta. Estiveron na nosa sala co seu espectáculo A biblioteca máxica: Especial Gloria Fuertes. Os nosos usuarios e usuarias pasárono moi ben cantando as cancións cos textos de Gloria, facendo teatro de sombras e desfrutando dos malabares dos artistas.

O mércores 20 de xullo e da man de Maumarela os rapaces e rapazas das Pontes aprenderon moitas cousas sobre os dinosaurios. Ademais crearon o seu propio fósil.

O pasado martes 19 os rapaces e rapazas das Pontes combateron a calor escoitando os contos de Bou Catrineta, na voz e na música de Inacio Vilariño. Pasarono moi ben e participaron cantando e bailando acompañando a Inacio.

O pasado xoves 19 a biblioteca Enrique Rivera Rouco das Pontes de García Rodríguez tivo a sorte de acoller o Océano para terrícolas de Xurxo Souto. Coas historias do seu libro Contos do mar de Irlanda, achegounos un pouco máis a ese océano descoñecido para nós, xente do interior.

Cantamos con el, rimos e desfrutamos desas historias do Gran Sol, parte importante da nosa cultura galega.

O acto enmarcouse dentro dun programa máis amplio con actividades de homenaxe a Manuel María coas que celebramos as Letras galegas 2016.

O pasado 2 de abril a Biblioteca Enrique Rivera Rouco celebrou o día internacional da literatura infantil e xuvenil xunto a Paco Nogueiras. O músico contounos e cantounos os temas do seu libro-disco Brinca vai! Foi moi numeroso o números de rapaces e rapazas de As Pontes que bailaron e cantaron ao son do Brinca vai! Unha maneira estupenda de celebrar un día tan sinalado.