Este martes acompañounos Paula Carballeira para falar da súa obra teatral “As Alumnas”, coa que gañou o Premio Nacional de Literatura Dramática en 2023. Foi unha charla do máis gratificante na que falou de como xurde a idea, como vai artellando os diferentes elementos sobre unha base histórica fiel e sempre presente, onde tamén deixa a súa pegada persoal. Todo isto, amenizado co seu bo facer como contadora onde non faltaron as risas e as anécdotas que xurdiron coas diversas representacións da obra. Quedamos encantadas de pasar unha tarde tan amena, recordando e aprendendo  como era o sistema educativo da muller na primeira metade do século pasado.

Neste obradoiro traballamos sobre os discursos de odio, que son, que tipos existen e como detectalos, ademais de darnos as ferramentas necesarias para rematar con esta clase de discursos. Que a grandes rasgos son detectables, pero no noso día a día supoñen unha serie de micro ideas e relatos que repetimos e perpetuamos sen darnos conta dos perxuizos que estamos a ter. Despois do obradoiro e dun debate chegamos a conclusión de que a tolerancia, o coñecemento e o respeto, son as claves para entender e poder vivir nunha sociedade mais tolerante e inclusiva.

Onte “paseamos con Elas” polas rúas de Compostela, da man de Rosa Leiro que nos fixo unha ruta moi interesante e participativa na que “Elas ” foran as grandes protagonistas, mulleres de moi diversos eidos que traballaron intensamente a favor da defensa da nosa cultura e na loita pola igualdade da muller. Foi unha tarde moi entretida na que non faltou a lectura, os cantos e os novos coñecementos. Desexando repetir máis paseos como estos.

O idadismo é un termo do que oímos falar cada vez máis, sen embargo, seguimos vendo situacións nas que non se escoita a opinión da xente nova ou non se contrata a unha persoa por ser “demasiado vella”. Neste obradoiro aprenderemos a detectar estas situacións que tan amiudo vivimos sen darnos conta. Pasamos un ratiño moi entretido con Alex da Sociedade Cooperativa Galega Atoupa, que nos deu  un feixe de exemplos e ensinanzas para a sua detección.

Este venres para celebrar o Día do Libro, tivemos na Biblioteca José Saramago de Santa Marta, unha morea de contos divertidísimos que fixeron as delicias da cativada. Libros que dende o humor traballan cuestións tan importantes como a igualdade, a autoestima, a amizade ou a solidariedade.
Pasamos unha tarde moi amena e participativa da man de Soraya Lema, estamos desexando repetila.

O sábado 9 de setembro, gozamos dun espectáculo familiar moi divertido, no que Pakolas, coma sempre, a un ritmo moi rockeiro, fixo que as nenas e os nenos aprenderan a importancia de medrar e vivir en igualdade mediante cancións e contos onde ELAS son as protagonistas.

Este venres 3 de xuño, cinco nenos e nenas desfrutaron dunha tarde de historia, aventura, misterio e diversión cun contacontos e obradoiro, impartido por Andrea Barreira, sobre a aviadora e aventureira Amelia Earhart. Puideron coñecer a súa historia e mesmo deseñar e construir os seus propios prototipos de avións.

Este martes 24 de maio, fixemos un percorrido da man de Yolanda Castaño dende os seus inicios, sendo unha cativa que admiraba a Rosalía e soñaba con crear poemas como ela, á muller poetisa que é hoxe, cunha carreira imparable, eso sí, con gran esforzo, reinventándose cos anos sen decaer ata poder vivir da sua obra poética.

Agardamos ter máis oportunidades coma esta de gozar coa súa poesía.

Este venres 20 de maio, gozamos coas andanzas de Maruxa, que xa non quere ser bruxa como o resto das mulleres da súa familia. Ela quere ser artista e demostrounos o seu bo facer contando contos, cantando, bailando e tocando o requinto. Os nenos e nenas pasaron unha tarde moi animada cantando as cantigas e meigallos de Maruxa.

Este venres 8 de abril os nenos e nenas dos Centros Socioculturais do Concello de Santiago, gozaron na biblioteca pública José Saramago de Santa Marta dunha tarde moi divertida e educativa da man de Patricia Martínez. A través de xogos e de contos ensinounos a respectarnos, a ser solidarios cando estamos xogando, a expresar os nosos sentimentos sen medo … boas accións, que igual que no conto “O elefante e a xenerosidade” teñen a súa recompensa.