Na A.L.M de Coiro celebramos o día das Bibliotecas na compaña de Magín Blanco, un día de festa aderezado coa música de Letras e Notas do abecedario para os máis novos.

Nenos e maiores desfrutamos dunha xornada de portas abertas para celebrar o noso día.

No Auditorio de Cambados, o 24 de outubro, celebramos o Día  das Bibliotecas co Teatro Ghazafelhos e a súa obra “Camiñando entre estrelas”.

A biblioteca municipal Luís Rei, grazas  ao programa Ler conta moito, puido contar con esta actividade que fixo as delicias de pequenos… e non tan pequenos… velaí van algunhas imaxes…

Con motivo da celebración do Día das Bibliotecas, este sábado 21 de outubro os cativos de Sanxenxo mergulláronse nunha serie de historias encadeadas, coas que Andrea Vázquez “dos Piñeiriños” nos deleitou a todos.

Mergullámonos? é unha actividade de narración oral con axuda de marionetas, música, cancións e danza para conectar cos rapaces, transmitir valores, e chegar ao corazón das emocións que sensibilicen aos máis pequechos sobre sobre a importancia de coidar e manter limpo o medio ambiente.

Onte tivemos na biblioteca o contacontos de Raquel Queizas, Romaria. Pasámolo moi ben e o tempo acompañounos, polo que decidimos realizar o contacontos fóra.

Moitas grazas a todos os que acudistes e a Raquel por divertirnos tanto.

En conmemoración do Día da Biblioteca, programouse o 24 de outubro a realización dun contacontos titulado: “O pucheiro da señora Emilia” realizado por Charo Pita que contou as historias, de aquí e de alá, de medo e de risa, tristes e enxeñosas, que lle suceden a aqueles que teñen o pucheiro da señora Emilia. Os nenos e nenas asistentes quedaron engaiolados coas historias e contos e disfrutaron e participaron na actividade.

Onte 24 de outubro, Día das Bibliotecas, gozamos na Biblioteca de Portonovo dunha sesión de contacontos con Cris de Caldas.
Cris achegounos a súa proposta “Rosa non é unha cor” coa que gozaron tanto os pequenos como os maiores (mamás, un papá e algunha avoa), que participaron activamente.

Ao terminar os contos, os nenos xa estaban a demandar o taller, pois lles facía ilusión desde o principio.
No taller foi moi agradable ver aos maiores axudando aos máis pequenos, e o resultado final vese na foto na que pousan todos moi orgullosos con Cris.

Grazas Cris!

Onte festexamos o Día da Biblioteca cun espectáculo da compañía Elefante Elegante, Lobo Bobo.
Como nos divertimos pequenos e maiores!!!!

“As Parábolas de Pakolas” chegou da man de Paco Cerdeira como espectáculo de pequeno formato no que Pakolas interpretou unha escolla dos seus temas, con música xirando en torno ao rock e outros estilos que fixeron bailar e cantar aos cativos e cativas e os adultos! Parábolas, historias e recomendacións de libros foron unha combinación perfecta coas cancións elixidas por Pakolas!

Pakolas nos visitaba por primeira vez e seguro que repetirá porque a actividade gustou moitísimo!

Foi un auténtico pracer celebrar o Día da Biblioteca con él e cun cheo absoluto da sala infantil a pesar do bo día que estaba fora! Espectáculo moi recomendable!

Na biblioteca de Irixoa roubaron un manuscrito moi valioso.  Afortunadamente o ladrón deixou restos biolóxicos, e coa axuda dos nenos e das nenas que estaban na biblioteca para celebrar o Día da biblioteca, e usando material de cociña sacamos ADN que atopamos dos ladróns e resolvemos o caso aprendendo que é a biotecnoloxía.