O venres 27 de marzo  “Pavís , pavós” estivo na biblioteca de Valdoviño contando os “CONTOS QUE DEIXAN PEGADA” , actividade enmarcada no programa de animación á lectura que se desenvolve os venres pola tarde.

O día 27 de marzo David Gundín (GUN) entretivo ós cativos cun contacontos que buscaba achegarlles algunhas das obras máis coñecidas de Shakespeare, “Romeo e Xulieta” e “o Rei Lear”, dun xeito divertido e procurando en todo momento contar coa colaboración dos pequenos que o pasaron en grande convertidos nalgúns dos máis embleméticos personaxes do célebre autor inglés.

O 27 de marzo celebramos na Biblioteca Municipal de Poio o Día Internacional do Teatro, coa actuación especial do grupo Expresións Produccións, co seu espectáculo “Conto contigo”.Contos, maxia e monicreques estiveron presentes durante todo o programa.

O pasado venres, 27 de marzo, presentouse na Biblioteca da Silva, Violeta e a súa familia para descubrirlle as nenas e aos nenos de Cerceda un vello libro  de cores e contos que nos fixeron cantar e rir e, crer que os problemas teñen solucións e que os soños poden ter todas as cores que queiramos.

A actuación foi un éxito. Raquel  fixo que os nenos viaxaran por distintos países cas historias.

O 27 de marzo os nenos de Vilasantar divertironse na biblioteca facendo ilustracións con comestibles.

O pasado venres 27 de marzo tivemos na Biblioteca Ágora unha actividade coa que quixemos celebrar o Día Internacional da Literatura Infantil e Xuvenil, e para o cal aproveitamos tamén as oportunidades que ofrece o programa Ler Conta Moito.

70 nenos e nenas, dos centros educativos CEIP Raquel Camacho e CEE Nuestra Señora de Lourdes – Aspronaga, foron protagonistas dunha xornada na que por un lado desenvolveron a proposta Ti tes moito conto!, organizada desde a Biblioteca coa súa colaboración, e por outro asistiron á actuación de Inácio, que nos deleitou cos seus contos do demo e coa contada da Nau Catrineta.

Con Ti tes moito conto!  buscamos traballar en dous aspectos que cremos de interese para os hábitos do alumnado participante: dun lado o fomento da lectura a través do coñecemento lúdico de contos e historias clásicas ou de tradición popular; doutro, a colaboración e o traballo en equipo entre alumnos e alumnas de centros diferentes e de realidades que non son as que viven a diario.

Como diciamos, a actuación de Inácio foi un fin de festa estupendo para a actividade final que preparamos o pasado día 27. A súa capacidade de interacción cos nenos e nenas, o carácter acumulativo das historias relatadas -que facilitaba a participación activa nas mesmas- e o propio interese do contido fixo que todos e todas gozaramos dunha sesión ben divertida e proveitosa.

No marco do programa “Ler conta moito” o luns 30 de marzo ás 12 h, cunha Biblioteca ateigada de nenos e nenas, a compañía Sarabela Teatro representou “Conto Express”

Contacontos para rapazada a partir de 5 anos. Os contadores, Xanela Ocio, nos achegaron un mundo de contos tradicionais onde os roles de xénero se cambian. O personaxe da muller, neste caso “Tarzana”, respondendo a papeis onde teña que demostrar forza, intelixencia, e afrontar retos. En cambio, o masculino, neste caso “O lobiño carapuchiño”, situado nun contexto tradicionalmente feminino.
Por que non? Cambiando os papeis os contos tamén son fermosos, interesantes e gustan de ser escoitados.

Ver máis: no blog das bibliotecas de Redondela.

O pasado venres 27 de marzo iniciamos as actividades de animación a lectura grazas ao Programa Ler Conta Moito en Cambados.

A través da ALM de Castrelo, puidemos levar a cabo a homenaxe ao Día Internacional do Teatro e  o encendido en azul da Naiciña de Asorey, para apoiar tamén á Asociación cambadesa Por Dereito, que traballa para a inclusión de persoas con autismo.

Todos os anos levamos a cabo na primeira semana de abril, a Semana Azul, en colaboración con Por Dereito e Bata, pero este ano ao coincidir coa Semana Santa prefirimos adiantala cun fermoso acto na Praza de Asorey que incluiu a intervención de pais da asociación, e a  actuación dos Quinquilláns co seu espectáculo “Porque é salgada a auga do mar?” . E como colofón, o encendido da escultura da Naiciña, uníndonos ao movemento mundial Light it up blue! promovido pola comunidade Autism Speaks co que monumentos destacados de todo o mundo tínxense de azul apoiando a inclusión de persoas autismo.

O espectáculo dos Quinquilláns foi todo un éxito, cunha posta en escena que sorprendeu e fascinou a todos os asistentes, sobre todo aos máis novos, cando, gafas de mergullo incluídas, nos adentramos nas rúas de Cambados convertidas no fondo mariño da ría de Arousa.