O día 21 de outubro Títeres Cachirulo representou O Libro da Selva, un espectáculo de títeres ao que asistiron 40 crianzas e 12 persoas adultas.

Dunha maneira amena e divertida, Mowgli e os diferentes personaxes que o acompañan, levaron a nosa Biblioteca ás espesuras da selva onde se viviron, durante 55 minutos, emocionantes aventuras que remataron con éxito para os protagonistas.

Migallas Teatro mostrounos o espectáculo “Merenda con pan de millo” destinado a público familiar e que tivo unha gran acollida por parte do público máis pequeno que coñecía e coreaba as cancións con gran entusiasmo.

O pasado sábado 18 de outubro, Cambados celebrou por todo o alto o 4º aniversario das novas instalacións da súa biblioteca municipal, na Casa dos Fraga. Grazas ao programa de animación á lectura Ler conta moito puidemos gozar do bo facer de Migallas Teatro.

O Concello de Cambados quería agradecer así  un ano máis a todos os seus socios e usuarios a súa asiduidade e amor pola lectura. Sobre todo, querían facelo cos máis implicados, os nenos e nenas do municipio…e a resposta non puido ser mellor!

Asistiron máis de 70 pais e rapaces ao espectáculo “Merenda con pan de millo”. Baseado no Libro-disco Pan de millo, editado pola Editorial Kalandraka , os asistentes puideron divertirse coas cancións, co proceso de elaboración do pan de millo como fío condutor. Os temas musicais que se interpretaron foron: “Pinocho”, Pan de millo, O piollo e a pulga “Unha vella tiña un can”, “Que cousa, cousiña é?” e “Miña Abuela Manuela”.

Sen dúbida a celebración foi todo un éxito!

Solidaridade Internacional achegou ata a Axencia de Lectura Municipal “Contos do Mundo: unha viaxe polo mundo a través dos contos”, esta vez visitando America Central a través dos relatos de Irene.

O venres 17 de outubro visitou a Axencia de Lectura de San Vicente a nosa amiga Irene, filla de cooperantes, que viaxou por moitos países, quen nos amosou un anaco dun dos países de América Central, Guatemala. Comezou esta viaxe cos acordes da “Marimba” (un instrumento parecido a un xilófono) moi popular en América Central. Utilizando fotografías foi presentándonos este fantástico país: a súa xeografía, as súas xentes, costumes, bailes, contos, etc.   

Nas súas viaxes sempre coñece a moita xente e neste caso, coñeceu a unha muller que lle contou un conto popular de Guatemala. O conto titulábase: O home que se transformou no sol. Coa participación dos nenos e cun xogo de cores relatou esta historia na que se nos describe como naceu o Sol.

Todos os asistentes pasaron una tarde de lecer, escoitando as narracións de Irene, aprendendo os costumes de Guatemala, bailando ao compás da música e divertíndose moito.

A Biblioteca Central de Arteixo, foi o escenario da representación de “A Orixe” de Raquel Queizás, quen ataviada con indumentaria representativa e acompañándose con música, fíxonos partícipes de contos de África, China e de Perú. Pequenos e maiores desfrutamos e participamos nunha sesión que nos levou por distintos lugares do noso planeta.

O xoves 16 de outubro puidemos gozar na Biblioteca Central Rialeda dun espectáculo de maxia moi divertido e participativo. A “desaparación” e “aparición” dun billete, a corda que se tensa maxicamente grazas á enerxía do público, o can branco que se convirte en negro e outra vez se volve branco e outra negro… a auga que sae polo cóbado dun neno e pode encher un vaso… unha estupenda tarde para os nenos/as e os seus acompañantes.

O martes 14 de outubro estivo na nosa biblioteca Teatro Calavera co seu espectáculo “O cociñeiro Antón e a pasteleira Tomasa”. Unha actuación moi divertida  que escenificou a historia de amor entre o cociñeiro e a pasteleira , enmarcada nun magnífico decorado que encantou  aos asistentes.

A sesión rematou cun obradoiro de decoración de pasteis con pasta fondant, no que nenas e nenos se convertiron en “virtuosos da  repostería” por un día… Foi todo un luxo culinario!!!

O luns 13 de outubro O Carballo con botas chegou a Cambados coa súa Titiricleta para comezar un maratón de contacontos que o levará ás axencias de lectura do municipio dentro dos actos organizados no mes por excelencia das Bibliotecas. A primeira parada a fixo en Castrelo e os pais e rapaces que asistiron divertíronse coas súas fermosas historias!

O venres 10 de outubro a Biblioteca Pública de  Valdoviño retomou o programa de “Contacontos os Venres” que pechou no mes de maio pasado con gran afluencia de publico familiar. Froito da casualidade o programa pechou coa posta en escena de “Xigantes” da compañía Miro Magariños e abre coa mesma compañía poñendo en escena “Merlos”, un espectáculo moi atractivo e moi tenro creado para público de curta idade.