E no Día das bibliotecas, o 24 de outubro, tivemos a sorte de contar con Anxo Moure que, vestido de árbore e a lomos do cabaliño Caramulo, nos trouxo o espectáculo: “Unha árbore vén a vernos”.

Nesta ocasión, foron os alumnos de 5º e 6º de primaria do CEIP de Outes os que participaron desta actividade.

A pena foi que a choiva nos nos permitiu saír a abrazar as árbores no souto ao lado da biblioteca.

O mércores 23 de outubro, seguindo cas actividades do Día da Biblioteca, Eli Ríos realizou dúas sesións do obradoiro de diversidade sexual para a mocidade que destinamos aos alumnos de 3º e 4º da ESO do IES Poeta Añón de Outes.

Axudándose de materiais audiovisuais e textuais, abordáronse temas moi interesantes e necesarios como: a diversidade sexual e de xénero, a discriminación, a explotación infantil, a pornografía…

Tivo unha moi boa acollida polos rapaces e polo profesorado que marchou encantado. Unha actividade moi formativa e enriquecedora. Moitas grazas, Eli.

O martes 22 de outubro, seguindo coas actividades do Día da biblioteca, tivemos, na Biblioteca Municipal de Outes, a compañía de teatro Ghazafelhos co espectáculo: “A máquina do tempo”.

En esta ocasión, foron os alumnos de 1º, 2º, 3º e 4º de primaria do CEIP de Outes os que desfrutaron da obra. Dunha forma moi participativa, fomos revivindo as diferentes etapas da historia do ser humano. Actividade moi  divertida e amena na que os rapaces o pasaron de marabilla e os profesores saíron encantados.

Coincidindo co Día das Bibliotecas (24 de Outubro), onte quixemos celebralo con Trécola Teatro e o seu “Sen Medo”, que tamén puxo a guinda ó programa “A Biblioteca conta en Igualdade”.

Da man de Tegra e a súa compañeira, os nenos e nenas que participaron neste contacontos puideron escoitar historias que plasman diferentes realidades do día a día.

Pasamos unha gran tarde. Noraboa pola actuación…

O luns 21 de outubro comezamos as actividades do Día da biblioteca. Ás 11 da mañá, os nenos e nenas de educación infantil do colexio de Outes puideron desfrutar dos divertidos “contos con ovos” de Pablísimo. Un conxunto de historias breves onde os protagonistas son os ovos.

Sesión moi amena e divertida que nos soubo a pouco. Quedamos con ganas de máis.

Ler máis →

O día da biblioteca celebrámolo pola mañá acompañados do “Cantacontos” de Sergio Rivas ao que acudiron os nenos e nenas do Ceip Rosalía de Castro que disfrutaron dabondo con este xenial artista.

E despois pola noite tivemos a sorte de contar coa actuación de Iria Mejuto con BlackGalicia “Soul e literatura”, un percorrido pola música negra de todos os tempos. Moi recomendable.

O pasado mércores, día 23 de Outubro, estiveron en Darbo María Faltri e Jorge Juncal co seu espectáculo “Fantasía Musical”.

Foi un concerto moi ameno, con temas de distintos xéneros musicais. Nenos e nenas divertíronse cantando, bailando e xogando coas letras do abecedario. Un estupendo peche do programa Ler Conta Moito deste ano.

O xoves 24 de outubro ás 12:00 horas na Casa da Cultura o alumnado de infantil dos colexios de Neda poideron gozar da visita de Pablo Díaz e o espectáculo “TIC TAC TOC canta comigo” baseado no seu cuarto libro disco. Foi unha sesión moi animada e as nenas e os nenos pasárono xenial.

Teatro en Punto estivo en Láncara coa sua actividade de divulgación do coñecemento “O PC non é un ordenador”. Grazas ás dúas actrices-relatoras puidemos coñecer o concepto de Patrimonio Cultural, tanto material como inmaterial, a estar atentos ao noso redor e a poñelo en valor.

Petróglifos, mámoas, asentamentos e unha ponte romana, escudos, igrexas de diferentes épocas, persoeiros ilustres… Láncara é moi rica en patrimonio cultural. Se abrimos os ollos e facemos as preguntas adecuadas, contribuiremos a que perdure no tempo o xa herdado grazas aos nosos devanceiros. Os cambios están nas mans das nosas crianzas e mocidade, pero tamén conservar e legar de novo o patrimonio e tradicións.