O pasado venres tivemos o pracer de recibir aos integrantes de Ciencia en ruta que desenvolveron un obradoiro de submarinos ante 30 nenos e nenas. Coido que nunca esquecerán o principio de Arquímedes !, polo xeito tan didáctico co que o aprenderon.
Mestura de contacontos e obradoiro práctico e participativo.
Luís Vallecillo trouxo á ALM de Carnota un divertido repertorio de cancións-conto protagonizadas por personaxes ben coñecidos por todas as nenas e nenos: os tres porquiños, o gato Mimí, a Galiña Azul… Cantamos un conto na Biblioteca? é un espectáculo dinámico e interactivo que conxuga música e literatura.
A agrupación Pavís Pavós estivo o pasado día 15 de xuño na Biblioteca Pública Municipal “P. M. Martínez Ferro” e coma sempre foi un pracer escoitalos e velos. Un grupo de vinte cativos entre os seis meses e os catros anos acompañados dos seus pais pasaron unha tarde divertida con rimas populares, pequenos contos e cancións.
Contos para bebés en Caldas de Reis con Pavís Pavós
María Canosa na biblioteca municipal de Lalín
O pasado 27 de xuño ás 17:30 a biblioteca municipal “Varela Jácome” de Lalín acolleu a actividade “Perder o medo a través da poesía”, dentro do programa “Ler Conta Moito” da Xunta de Galicia.
María Canosa na biblioteca municipal de Lalín
A actividade, orientada a nenos e nenas de 3 a 6 anos foi impartida por María Canosa, quen narra dende a perspectiva dunha nena como foi capaz de desfacerse dos seus temores a través da poesía. Así pois, a narradora, mediante a lectura de varios poemas, tratou os diversos medos aos que polo xeral se enfrontan os máis cativos e cativas para que, finalmente, poidan darse conta de que existen moitas razóns para eliminar eses receos.
Na Biblioteca Municipal da Sagrada Familia 12 cativos de entre 8 e 12 anos aprenderon a debuxar os autorretratos de Maruja Mallo tomando por referencia os deportes favoritos de cada un. Aos rapaces entusiasmoulles coñecer a figura da autora e representarse ó xeito da súa pintura, e se quedaron con ganas de rematar o seu debuxo porque estaban tan inmersos no obradoiro que unha hora lles soubo a pouco.
En Fundación Ferama o pasado día 23 de xuño demos por finalizado o curso 2016/2017 cunha gran festa de despedida onde despois dunha semana de entrega de diplomas, coñecimos os gañadores do concurso “Bo Lector 2017” e gozamos dunha proposta divertida, participativa, amena e sobre todo máxica como é o espectáculo “Madame Bechamel e Signorina Bolognesa “ na Axencia de Lectura.
Madame Bechamel e Signorina Bolognesa na Axencia de Lectura Fundación Ferama
“Madame Bechamel e Signorina Bolognesa “ son dúas cociñeiras aloucadas e un pouco máxicas que cociñaron en colaboración co público, un saboroso bico mentres contaron un conto sobre o amor imposible entre un mago e unha bruxa… ou non tan imposible? Con cancións, xogos e outras sorpresas coas que gozamos e soñamos.
O día dezasete de maio, na Biblioteca Pública Municipal de Moeche, e cunha abundante participación, tanto infantil como adulta, estupenda actuación de Cris de Caldas coa obra “A Galiña Azul e compañía”.
Risas e participación para mergullarse e profundar na figura e a obra de Carlos Casares no seu día.
Este obradoiro, dirixido ao alumnado de secundaria do CPI San Vicente, estivo desenvolvido por dous regueifeiros o pasado venres, 23 de xuño, en horario de mañá.
A mocidade puido achegarse, cun toque de humor, ao mundo da disputa oral en verso sobre diversos temas tal como facían de maneira espontánea os nosos antepasados.
Foi unha boa oportunidade para desensolver a axilidade mental, o humor, a improvisación, o enxeño, a mordacidade…
O xoves 22 de xuño Celtia Figueiras tivo unha nova sesión de contos na Biblioteca Municipal de Chantada.
Dentro do ciclo das Estacións en contos, nesta ocasión tróuxonos os contos do verán.
Leo Leiño fíxonos pasar unha boa tarde de maxia e libros na biblioteca de Xermade. Os asistentes desfrutaron e participaron en cada un dos seus trucos de maxia con ilusión e moita atención. Faloulles do “Principiño”, do “Viaxe ó centro da terra” e doutros moitos libros de calidade e que merece a pena que os rapaces lean. Leonor e Cristina ían enlazando detalles destes e doutros contos, cos seus marabillosos trucos de maxia.
Séguenos