Na biblioteca Miguel González Garcés de Culleredo, celebramos a Semana do libro cunha programación especial. Unha das actividades elexida foi un contacontos para bebés, Triquitraque-traquetriqui, a cargo de Charo Pita. A actividade durou 40 minutos, pero os bebés aguantaron perfectamente e aos pais e nais encantoulles. Charo, cantounos, contounos, rimounos e todos xuntos xogamos a cabalgar nun cabalo.
Charo Pita achegou ata a Biblioteca Municipal do Grove o espectáculo Triquitraque Traquetrique na mañá do sábado 10 de maio.
Trinta bebés acompañados dos seus pais e nais, asistiron a unha sesión moi especial de contacontos onde a narración de historias viña acompañada de xogos de palabras, trabalínguas, xogos co corpo, cancións arrolantes, sons sorprendentes e música.
A pesar de que os nenos e nenas eran moi pequenos, portáronse moi ben e estiveron atentos ata o final, escoitando e participando cos seus pais e nais nesta divertida sesión de animación.
Na Casa dos Fraga en Cambados, o pasado sábado 3 demos a benvida ao mes de maio cunha fermosa sesión de bebeteca da man da experimentada contadora de historias Charo Pita.
Grazas ao programa Ler conta moito palabras, trabalinguas, historias, algún silencio, libros, xogos co corpo, cancións arrolantes, sons sorprendentes, e todo un triquitraque (ou un traquetriqui) deixáronse sentir na biblioteca, para que os que dormen no berce tamén puidesen gozar coas historias no colo daquelas (e daqueles) que ben os queren… e vaia se así foi!
Cubríronse o total de prazas dispoñibles e a actividade resultou todo un éxito que, de seguro, volveremos a repetir!
Na Biblioteca quixemos celebrar o Día do Libro, entre outras actividades, cos cativos do concello, xa que debemos comezar a fomentar a lectura desde idades tempranas. Para iso contamos coa presenza de Pablo Díaz que lles ensinou o son e formas de diferentes instrumentos, contou historias ben bonitas como a dun rato que viaxa ata a lúa, e ensinounos as cores grazas a un crocodilo.
Tarde de música e contiños para os mais cativos.
O venres 4 de Abril festexamos na Axencia de Lectura Municipal de Chapela o Día do Libro Infantil e Xuvenil, convidando aos máis cativos a achegarse aos contos e mais á práctica de experimentos científicos.
A contadora Nita amenizou unha tarde moi divertida e instrutiva, onde pais e nenos gozaron da maxia da ciencia.
A actividade realizámola en dous grupos:
– Un primeiro grupo, con cativos/-as de 2 a 3 anos.
– Un segundo grupo, con cativos/-as de 4 a 6 anos.
Pais e nenos saíron moi satisfeitos, as valoracións foron moi boas e todos aprendemos e gozamos coa actividade.
VER MÁIS NO BLOG DAS BIBLIOTECAS DE REDONDELA: http://bibliotecasredondela.blogspot.com.es/2014/04/a-ciencia-divertida-de-nita-na.html
O 21 de marzo contos con música e cancións con Bea Campos na Biblioteca de Pontevedra. Os bebes e os seus pais disfrutaron moitísimo coas historia, a música e as cancións de Migallas.
O día 2 de abril, día internacional da literatura infantil e xuvenil, a Biblioteca das Pontes de García Rodríguez recibiu a visita dos contacontos Pavís Pavós, que nos contaron o seu Palma repalma contos para bebés. Os nosos usuarios máis novos pasárono estupendamente escoitando as aventuras do Polo Pepe ou do Crocodilo.
Choupiña e Trasnón reciben na biblioteca, cantando unha nana, a nenas e nenos e tamén a papás, mamás, avoas… Transmitindo un ambiente de tranquilidade para que todos estes pequenos de 0 a 3 anos non se asusten e collan confianza.
Choupiña e Trasnón, a medida que avanza a sesión vanse transformando para contar cos sentidos. Aparece Mariquiña a carteira que vai visitando a unha serie de personaxes, “abrindo portas” para ver á Vaca Paca, ao Can de Palleiro Patoso, a Chiño o Golfiño, a Cucho O Porco Celta…
Vaise logrando unha participación de pequenos e adultos e todos xuntos disfrutan tocando e tocándose, ulindo, escoitando…
Excelente actividade para gozar cos nosos fillos ou netos. De maneira circular, remata tamén dunha maneira tranquila, recitando un poema con música de fondo.
Tarde de sol como facía moito que non víamos, pequenos cos seus pais e nais e cancións, rimas e contos grandes e pequenos para animar
Contos para bebés
O mércores 9 de outubro visitounos na Biblioteca “Rosalía de Castro” de Sta. Cruz (Oleiros) Nita Romero cargada cun montón de contos e divertidos experimentos que fixeron as delicias de nenos e non tan nenos. A primeira sesión que comenzou ás 5 da tarde estivo dedicada a nenos e nenas de 0 a 3 anos, comenzamos sentados todos na alfombra escoitando o conto do “Globo vermello” para pasar as mesas e experimentar con globos inflados con vinagre e bicarbonato, facer maxia cun globo que cortamos coas tesoiras e despois inflou Nita, cantamos a canción da Lúa e escoitamos o conto da Estrela de Laura, para debuxar estrelas con paliños e acuarelas e facer arcos da vella con xabrón.
Na segunda sesión para nenos e nenas maiores de 3 anos, escoitamos contos , descubrimos a electricidade estática e a lámpada de lava que nos fixo brilar con luz incandescente, o papel que non se molla na auga…
Unha actividade moi divertida na que os nenos e nenas desfrutaron cos sinxelos experimentos e comprobaron que a ciencia está presente en moitas tarefas da vida cotiá.
Como en todas as actividades que se fan na biblioteca temos unha exposición na entrada da sala infantil onde os asistentes poden consultar información ou levar en préstamo os diferentes libros sobre experimentos, fisica e quimica, natureza aconsellados para cada unha das idades.
Séguenos