O pasado mércores viaxamos con Sarabela Teatro e a ratiña Sofía ata a muralla chinesa para tratar de resolver un grande enigma… Quen é o ser máis poderoso do mundo?

A maxia da palabra e o poder da expresividade, sen moito máis adobío, son as armas empregadas neste espectáculo para somerxer o público na trama. E vaia se funcionaron!

Isto non é unha caixa é unha montaxe máis que recomendable para fomentar a creatividade e a fantasía nos máis pequenos.  Que ben o pasamos! Imaxinación ao Poder!

O 31 de Xullo realizouse esta preciosa actividade na Biblioteca Municipal de Culleredo. Os nenos  e nenas saíron encantados: eles mesmos inventaron historias que plasmaron despois, escribindo, debuxando  e facendo deste xeito cadanseu miniconto.

Laura Alonso desenvolveu na Biblioteca Municipal de Lugo o seu obradoiro “A máquina de facer debuxos animados”, no que explica aos nenos e nenos cómo se facían os primeiros debuxos animados.

Eles mesmos fixeron a súa propia secuencia de debuxos e a continuación construiron un zoótropo co que dar movemento aos debuxos.

O martes 30 de Xullo, celebrouse na BPM de Paradela unha sesión de contacontos a cargo de “Iseo A Moura” que nos relatou a historia de Flora, unha nena que ve como un incendio arrasa con todo o verde do monte, menos coa fraga onde ela vive.

Ela vai averiguar porque a fraga consegue sobrevivir ao lume e o resto do monte non.

As árbores explícanllo coas súas cancións, e tamén son as que lle ensinan de que xeito pode axudar a recuperar a terra queimada.

Unha lección que os nosos nenos e nenas seguro non esquecerán!!

O paroleiro visita a biblioteca de Caldas de Reis da man de Pablísimo quen fixo rir, cantar e imaxinar  a un grupo de rapaces e de rapazas que viron como das súas maletas e petos saían poemas e contos.

Estupenda tarde a que pasaron nenos e maiores co espectáculo “Maxia e libriños con Leo Leiño”. Dentro dun proxecto integrador de nenos e maiores e co obxetivo de achegar a biblioteca a colectivos que por circunstancias non poden vir a biblioteca, está esta iniciativa. No Asilo Fundación Nosa Sra dos Anxos, da cual forma parte na Fundación o Concello de Ribadavia, levamos a cabo un proxecto que incluía una exposición do fondo local, un expositor fixo con libros de fácil lectura, contos e revistas e unha actividade de fomento da lectura na que tamén achegamos aos nenos, para pasar unha tarde de convivencia e compañía cos maiores do Asilo, algo enriquecedor para os nenos e unha ledicia para os maiores  residentes. Estas son as fotos da actividade:

Que en Carnota somos superfans de Pablísimo non é novidade ningunha. Confirmadísimo!

O pasado mércores gozamos a máis non poder cos seus Contos con ovos, un conxunto de historias breves vertebradas arredor dos ovos e do que sae deles. Unha contada dinámica e orixinal, enriquecida cunha coidada escolla de materiais e coa mestría do narrador que, novamente, fascinou a xente miúda, e a menos miúda tamén, dende o minuto cero.

Será posible que sempre nos deixe con gana de máis? Pois si… é posible!

Divertido e emotivo: as malas novas  sobre a violencia de xénero se transforman en corazóns de papel reciclado feito no obradoiro polos nenos e nenas.

Laboratorio de Radio achegou aos nenos e nenas da biblioteca algúns dos elementos da linguaxe radiofónica: a voz, a música o silencio…

Para a continuación gravar un fragmento dun conto, ilustrado sonoramente con distintos aparellos, algún deles elaborados por eles mesmos.

Un grupo de nenos e nenas pasárono en grande con Inacio Vilariño de Fantoches Baj. Contos e cancións para enfrontarnos a todo tipo de medos e situacións perigosas.