Onte 24 de outubro, Día das Bibliotecas, gozamos na Biblioteca de Portonovo dunha sesión de contacontos con Cris de Caldas.
Cris achegounos a súa proposta “Rosa non é unha cor” coa que gozaron tanto os pequenos como os maiores (mamás, un papá e algunha avoa), que participaron activamente.

Ao terminar os contos, os nenos xa estaban a demandar o taller, pois lles facía ilusión desde o principio.
No taller foi moi agradable ver aos maiores axudando aos máis pequenos, e o resultado final vese na foto na que pousan todos moi orgullosos con Cris.

Grazas Cris!

Hoxe, na biblioteca Monte Alto, tivemos a Solidaridade Internacional de Galicia contándonos historias de África. Tanto os peques coma os adultos quedamos marabillados cos contos, as lembranzas, a vida cotiá e os costumes que fomos descubrindo grazas a María. Unha sorte tela connosco.

O mércores 4 de outubro, Charo Pita visitou a Biblioteca de Portonovo co seu espectáculo para bebés.

Os bebés que, xunto cos seus pais, se acercaron á sesión, disfrutaron dun rato divertido e moi tenro. Charo Pita engaiolounos coas súas cancións, rimas e contos, e foi moi bonito ver os papás, sempre máis serios, sonrir e disfrutar cos seus cativos no colo.

Cando rematou a sesión, os pais estaban moi agradecidos por participar e sorprendidos de que algo así acontecese na biblioteca. De feito, para moitos era a súa primeira visita á biblioteca e descubriron tamén os servicios que temos para ofrecerlles.

Dende aquí o noso máis agarimoso agradecemento a Charo Pita!!!

Onte, 24 de maio, na biblioteca Monte Alto (A Coruña) tivemos a inmensa sorte de gozar do espectáculo de Migallas “Contos do chupete“. Un pequeno lobo nada disposto a soltar o chupete levounos dun conto a outro e dunha canción a outra: “Chibos chibóns“, “Os tres poquiños“, “Polo camiño” e “Lúa” fixeron as delicias de grandes e pequenos.

Como podedes ver nas fotos, foi un tarde marabillosa, chea de música, risas e, sobre todo, fermosas lecturas! Grazas, Bea e Paolo!

Grazas á coloboración co programa de animación á lectura nas bibliotecas “Ler conta moito”, o sábado 20 de maio tivemos un Bbencontro especial na Biblioteca Municipal Os Rosales.  María Faltri e Jorge Juncal (“Papi e Mami”) presentáronnos “A nosa música con Jorge e María”. Xunto ás  familias participantes, con nenos ata os 3 anos, gozamos da música ó vivo, da poesía, da manipulación de obxectos e decubrimos o seu novo libro-disco:”Fantasía coas palabras” .

Coma sempre un pracer.

María Faltri e Jorge Juncal na Biblioteca Municipal Os Rosales

O pasado venres 19 de maio, a compañía Elegante Elefante puxo en escea o seu espectáculo “Lobo Bobo” na Biblioteca de Portonovo, que se quedou pequena para todos os que quixeron participar desta actividade.

O público disfrutou dunha sesión moi amena e divertida que se desenrrolou de forma áxil e con complicidade dos asistentes. Como veredes había xente de todalas idades que o pasaron xenial pois así o dixeron ó rematar o espectáculo, tanto cativos como mamás.

Moitas grazas Gonçalo!

Para pechar a semana das “Letras Galegas” contamos na biblioteca coa actividade “LETRAS E NOTAS” con MAGÍN BLANCO. A biblioteca de A Rúa ateigouse de nenos de infantil e primeiros cursos de primaria dos colexios do Concello: Pablo VI-Fátima e Manuel Respino. Arredor dun cento de nenos e 10 profesores participaron no espectáculo musical no que Magín Blanco ía creando un universo con abecedarios, números, adeviñas e contos. Os nenos cantaron e bailaron.  ¡Pasaron un rato moi divertido!.

O venres 12 e o martes 16 tivemos con nós na Biblioteca Pública Municipal de Vedra as actuación de “Comechíns, segundo prato” e “Contos de medo que deixan durmir” para celebrar o Día das Letras Galegas dentro do programa Ler Conta Moito. Dúas propostas lúdicas que conectaron moi ben cos máis pequenos da biblioteca.

Onte, con  Ana Romero (Nita), os nenos e nenas que acudiron á biblioteca comprobaron o divertido que pode resultar xuntar os contos coa ciencia.

E experimentar coas cousas cotiás…

Actividade de contacontos con música , xogos e debuxos.