O pasado venres 5 de xuño contamos coa compañía Trémola Teatro coa representación do espectáculo Nube de algodón. A proposta, dirixida especialmente a bebés e ás súas familias, converteuse nunha experiencia chea de tenrura, participación e descubrimento emocional.

Durante a sesión, as crianzas acompañaron a Nube, unha pequena protagonista que cambia de cor segundo as emocións que sente: alegría, tristeza, enfado ou sorpresa. A través da narración, da música, dos estímulos visuais e da interacción co público, o espectáculo convidou ás familias a explorar o mundo das emocións dun xeito próximo e adaptado á primeira infancia.

As persoas asistentes participaron activamente nunha proposta que combinou o conto oral co xogo e a expresión emocional, creando un ambiente acolledor no que bebés e persoas adultas compartiron momentos de atención, curiosidade e complicidade. A delicadeza da posta en escena e a proximidade da intérprete favoreceron unha experiencia especialmente pensada para os máis pequenos e pequenas da casa.

O éxito de participación e a excelente acollida recibida por Nube de algodón volveron demostrar o interese das familias por actividades culturais de calidade dirixidas á primeira infancia, reforzando o compromiso coa promoción da lectura e da educación emocional desde os primeiros anos de vida.

Co gaio da celebraciónlebrando as actividades enmarcadas nas Letras Galegas, na biblioteca de Coiro  da man de Trémola teatro tivemos a ocasión de recordar ás avoas e os seus cantares. Avoas que emigraron e que seguiron cantando en galego facendo perdurara  canción en galego de xeración en xeración. Tarde divertida onde a animadora conseguiu que adultos e pequeno arrincarana bailar e dar palmas ao son das cancións da avoa.

Hoxe pasamos unha tarde moi divertida con Carlos Yus de Migallas Teatro, que nos trouxo a Chantada unha morea de contos e cancións, co que conseguiu que todos os asistentes, grandes e pequenos interactuasen.

A Biblioteca Municipal Isidro Novo de Lugo acolleu onte unha nova actividade do programa Ler conta Moito da man de Bea Campos, que presentou o espectáculo “Limón, contos e cantos”.

As crianzas máis pequenas, acompañadas das súas familias, gozaron dunha proposta chea de música, narración oral e participación. A través de contos e cancións, e coa compañía de tenros animaliños que foron aparecendo ao longo do espectáculo, Bea Campos deu vida ás historias e conquistou ao público asistente.

Onte recibimos a visita do mago, Dani García na Biblioteca de Vilalonga. O mago realizou trucos de maxia, mentalismo, desaparición de obxectos; en todos eles fixo participes aos nenos, e aos seus papás, os cales saíron ao escenario como axudantes. Foi un espectáculo moi dinámico, no que o humor foi o fío condutor a través da comunicación do mago cos nenos, onde recorría aos chistes e bromas durante toda a sesión. Finalizou cun número de ilusionismo que provocou a alegría de todos os asistentes. Ao final da sesión, os nenos mostraron interese por libros sobre ilusionismo, ciencia e misterio.

Obradoiro moi completo no que Iria, de Xogando nas nubes, explica moi ben o que é un libro pop-up e como se fan os mecanismos para facer que as imaxes cobren vida e movemento. Os participantes estiveron moi entretidos creando o seu propio libriño cunha carpetiña de cartolina na que van engadindo as páxinas que van creando cos elementos pop-up. Na primeira hora do obradoiro todos os participantes elaboraron unha cara na que tiveron que recortar, pintar e decorar ao gusto para despois unir e pegar todos os elementos. Na segunda hora algúns fixeron unha bolboreta e outros unha colmea de abellas. Finalmente, pegaron as dúas páxinas e deixaron espazo para seguir creando na casa. O libriño quedou fabuloso e a rapazada moi contenta.

O pasado venres os cativos/as gozaron dun gran xogo relacionado coas nosas Letras Galegas.

Catuxa estivo nas Pontes contando ao público miúdo un dos seus contos favoritos, A Cebra Camila. Como estaba un día estupendo fixemos a actividade diante da Biblioteca, no parque. Foi unha tarde moi divertida.

O pasado venres na Biblioteca de Sober os nenos e as nenas de Merendas con Contos recibiron a visita de Inma Soto e coñeceron a súa historia “Xela, aventura na fraga”.

O pasado sábado 30 de maio contamos coa presenza de Marta Ortiz na biblioteca infantil e xuvenil de A Senra, en Bergondo, onde levou a escena o seu espectáculo de narración oral para crianzas “Casa, casina, casona”. A través desta obra transmitiunos un variado repertorio de cancións, contos e adiviñas acompañadas dunha coidada selección de obxectos, sons e xestos cos que conseguíu aprender, divertir e entreter as máis pequenas ao mesmo tempo que fixo desfrutar dun agradable tempo en familia.