O mércores 7, ás 19.00 h, tivo lugar na nova sede da Biblioteca M. Central de Cambre a primeira actividade de animación á lectura nesta etapa que agora comeza. Iniciouse con Elisabet Hillerud e cunha proposta destinada, fundamentalmente, ás integrantes dos clubs de lectura. Un elemento complementario das lectoras adoita ser un caderno para anotar ás impresións ou comentarios que non queren esquecer para debatir na tertulia. Deseñar o propio “Caderno de lectura con Zentangle” fai que a propia lectura teña un compoñente máis persoal. Todas seguiron as mesmas indicacións de Elisabet e, sen embargo, todos e cada un dos cadernos resultaron diferentes! Unha actividade ideal para fomentar a concentración e a relaxación nestes tempos de incertidume.

Miguel Cortés achegounos o mércores á tarde á cultura e á escritura chinesa.

Un grupo de adultos pertencentes aos clubs de lectura das Bibliotecas Municipais de Cambre participaron neste orixinal obradoiro.

Dunha maneira moi amena e didáctica foinos adentrando nos catro tesouros que compoñen o proceso de escritura chinesa: o pincel, a tinta, o papel e o morteiro para desfacer a tinta.

A caligrafía chinesa ten diferentes niveis. Neste obradoiro Miguel Cortés móstrounos a máis sinxela, facendo un percorrido polos diferentes trazos, a orde destes trazos, o carácter conceptual da escritura, que máis que escribir é debuxar…

O primeiro caligrama que debuxamos foi o correspondente a “persoa”, e así avanzando paulatinamente de menos a máis, ata chegar ao caligrama “China”.

Rematouse o obradoiro participando dunha tertulia moi interesante, resaltando peculiaridades da sociedade china moi sorprendentes para un occidental.

O mércores día 9 pasamos unha mañá moi divertida na biblioteca. Estiveron con nós Noa, Antón, Uxía, o avó, a profe… Pero antes de recibilos fixemos uns exercicios previos para atraer a imaxinación…

Espellos coas mans, mirándonos a nós e ás compañeiras e compañeiros.

Con imaxinación, ollos e escoita, fomos coñecendo a Noa. Descubrimos que lle gustaba moito xogar á pelota, e tamén ás espadas, ler cómics e asubiar.

Unha sesión moi dinámica e divertida, con xogos de linguaxe cun abano co que podemos crear ata un diccionario non sexista, repeticións de textos e coreografías, mímica, teatro e psicoloxía. Así fomos descubrindo que cada persoa é especial.

Moitos parabéns a Sabela Gago pola súa profesionalidade e bo facer!

O mércores día 9 compartimos na biblioteca contos e música pola igualdade.

Contos dramatizados foron dando paso a diferentes ritmos musicais. O libro dos porcos, O Gato lambón, Orellas de bolboreta, Os de arriba e os de abaixo, Chivos chivóns… ata formar nenas, nenos e maiores unha Orquesta de animais!

Magnífico, coma sempre, Pablo Díaz trouxonos un feixe de cancións do seu repertorio musical para pasar unha tarde moi divertida. E tamén bailamos!

Desde os tempos de Sherlock Holmes a investigación policial cambiou moito. Existen novísimas ferramentas para resolver os roubos e crimes máis retorcidos e iso foi o que puidemos comprobar na nosa biblioteca o mércores: unha nova maxia, a “maxia” da biotecnoloxía!

Elisabet Hillerud marabillounos coas súas creacións elaboradas co método zentangle.

Na tarde do mércores 25 de setembro descubrimos que se poden realizar cun lápis e un rotulador fermosas imaxes, sen necesidade de ser expertos debuxantes.

A técnica zentangle é moi sinxela e os resultados son espectaculares, e ata unha nena ou neno ben pequeño o pode facer. Consiste en ir trazando patróns repetitivos, por exemplo espirais ata formar belas imaxes.

É unha técnica moi relaxante para quen a utiliza, que conduce á concentración e á tranquilidade. A través do zentangle actívase a autoestima, pois os resultados son moi impactantes sen necesidade de saber debuxar, simplemente tendo paciencia para seguir as secuencias. Unha maneira tamén de fomentar a sensibilidade artística.

Ao comezo da actividade Elisabet entrégalle a cada participante un caderno en blanco, cosido á man. Cando rematan levan para a casa unha pequena alfada na que poden ir dando conta das súas lecturas, e seguir ilustrando o interior das súas páxinas.

Elisabet Hillerud, magnífica. Transmite moi ben o entusiasmo polo zentangle.

Actividade moi recomendable.

O mércores 18 de setembro cantamos e xogamos na biblioteca. Estivo con nós MIGALLAS TEATRO, e coma sempre, fantásticos!

Canta connosco! é unha actividade baseada no libro-disco-DVD do mesmo nome, editado por Kalandraka que nos vai descubrindo o segredo de como naceron algunhas das cancións que o compoñen.

Combinan cancións con xogos dramáticos, o pracer da lectura e os xogos tradicionais.

A través dunha alternancia de realidade e ficción, María Campos e Carlos Yus cando queren cantar unha canción chaman a Antón e a Rosiña para que a canten e cunhas palabras máxicas aparecen deseguida.

Presentáronnos ás pulgas Pin, Pan e Pun.

Tamén nos trouxeron unha canción, “Dime que fixeches”, para os que son algo preguntóns, como Antón.

Para aprender os osos do corpo aquí estaba a canción “O esquelete”, para os/as que non son quen de memorizalos, con algo de ritmo e batendo as palmas, entran moito mellor.

A continuación mergullámonos no “Libro máxico” para vivir aventuras fantásticas e non aburrirnos.

Excelente actividade. Grandes profesionais, María e Carlos!

Magnífico, como sempre, o espectáculo de Paco Nogueiras. Con el celebramos na Biblioteca Central de Cambre o Día da Biblioteca.

Radio BULEBULE semella un programa radiofónico con música, humor, entrevistas, concursos, baile, cancións e tamén premios. Non falta a súa sintonía de entrada, axenda cultural, tertulia, noticias, sinais horarios ou previsión meteorolóxica.

Vivimos un auténtico programa de radio en directo, moi divertido, onde nenas e nenos son os verdadeiros protagonistas.

Escenario moi ben composto, colorista, presidido por unha enorme, enorme radio e unha mesa de son.

Radio BUBLEBULE está basado no libro-CD-DVD editado por Kalandraka Editora.

Paco Nogueiras conecta moi ben co público.  Composicións moi coidadas, cancións moi pegadizas, con moito ritmo que invitan a bailar.

A frescura do seu estilo e o dinamismo que contaxia, fai que este gran compositor e intérprete nunca defraude.

Actividade moi interesante para divulgar o coñecemento e a experimentación.

A modo de Museo onde está PROHIBIDO NON TOCAR, preséntannos unha serie de obxectos que espertan a curiosidade do público, non só infantil.

Os nenos e nenas teñen oportunidade de experimentar, tocar e comprobar a súa “maxia”.

Este Museo está magníficamente guiado por Xesús Fernández e Lana Rodríguez que saben transmitir e contaxiar a curiosidade de cada experimento.

Un dos maiores atractivos foi a Bola de Plasma, que algúns xa pensan pedir aos Reis…

Tamén o Motor Stirling lento, que funciona tanto cun foco de enerxia quente como fría, ou o Móvile, elemento que permanece nun movemento continuo.

O pédulo de Newton, que nos explica a transformación da enerxía potencial en cinética, os Patos Bebedores, ou a evolución que podemos apreciar nas Memorias informáticas. Tamén está presente a lei de Moore, o Principio de Arquímedes e o de Pascal a través do Diábolo de Descartes.

Non faltan panais de abella ou os estudios da Divina proporción, coa sucesión de Fibonacci…

Remata o percorrido cun divertido experimento dun vaso con auga, boca abaixo e só suxeito cun pedaciño de folio.

Actividade moi ben valorada por todos e todas as participantes.

O mércores 26 de setembro tivemos unha tarde máxica na Biblioteca Central de Cambre. Visitounos o Mago Pedro Bugarín que ademais de realizarnos xogos de maxia, ensinounos algúns trucos moi sorprendentes…

Trucos sinxelos a partir de obxectos cotiás como gomas elásticas ou palillos, xogos de mans… que despois os nenos e nenas poden compartir con outros neos e nenas.

Pedro Bugarín comeza demostrándonos as súas extraordinarias habilidades con algún truco realmente sorprendente que demostra gran profesionalidade.

Cartas asinadas polo público e que logo se trasladan e saen moi dobradiñas da súa boca…ou outras ben escondidas e baralladas aparecen cando o Mago quere…Cordas que despois de cortalas aparecen enteiras,.. Follas de libreta que só se lle cortan a el e ninguén dos asistentes é quen de rompelas, como se forna de plástico…

Actividade moi recomendable para pasalo ben no momento e despois, e para visibilizar e dinamizar os libros de maxia da biblioteca.