Hoxe, sábado 1 de xuño, recibimos no CSC de Santa Marta, en Santiago de Compostela, a visita de Patricia de Eduvía que veu presentarnos unha sesión de contacontos destinada a bebés de 0 a 3 anos e a adultos e adultas acompañantes.

A través das emocións e a experimentación, os máis pequenos puideron gozar dunha experiencia feliz, ao tempo que as súas familias adquirían ferramentas para potenciar a experiencia da lectura cos seus fillos e fillas.

Unha vez finalizado o contacontos, os asistentes achegáronse á biblioteca a coñecer a nosa sección de pequenos lectores.

Dani Blanco veu á Biblioteca José Saramago do CSC de Santa Marta, en Santiago de Compostela, a presentarnos a narración oral Murmuraban as miñas veciñas.

Un conto nunca se conta igual dúas veces. O contexto e a memoria vainos alimentando.

A través desta narración puidemos achegarnos a como foron as vidas dalgunhas mulleres de Cangas do Morrazo.

Unha actividade que gozamos moito e que non podemos deixar de recomendar.

Onte puidemos gozar en Santa Marta, dun obradoiro esencial para todas aquelas persoas que teñan ganas de mancharse as mans creando textos, porque é tan importante que contamos como o xeito en que o facemos, diso vai este obradoiro , de aprender dende a práctica, traballando con estímulos creativos variados, mesturando ingredientes para crear historias redondas.

Este obradoiro consistiu na representación dunha serie de escenas mediante as que se buscaba a complicidade dos asistentes e procuraba facelos partícipes das mesmas. O emprego da mímica e das onomatopeas fixeron que os cativos e cativas pasasen un intre moi entretido e cheo de risas.

Tomando como partida a novela “O xogo de Ender” (logo tamén levada á gran pantalla) os nenos e nenas achegáronse a ese microcosmos mediante o emprego de pistolas láser. Tamén conduciron un coche teledirixido feito con material de refugallo.

O pasado martes, Carmen Conde como narradora oral, falounos de como ir á base para salvar a esencia transmisora. Ela traballa a expresión oral, o maxín, o discurso propio, a creación de mundos e algo fundamental: a escoita.

Pasamos unha tarde estupenda cun espectáculo de monicreques que nos fixo recordar á autora de Cantares Gallegos.  Ó longo da actuación atopamos elementos enxebres como a Pedra de Abalar de Muxía.

Este obradoiro de escrita impartido por Andrea Barreira, Eli Ríos e Jara Ortiz convida aos participantes a reflexionar sobre diversos aspectos da literatura que, en principio, poden quedar, e de forma involuntaria, relegados á hora de comprender na súa totalidade un texto.

A sesión comezou realizando unha pequena introdución sobre algunhas escritoras ( Marilar Aleixandre, Ledicia Costas, María Reimóndez, Jane Austen…) destacando certos aspectos da súa produción literaria. A continuación desenvolvéronse unha serie de dinámicas, como foi a lectura e o análise de certos fragmentos, coas que debíamos cavilar sobre se se trataba de personaxes femininas ou masculinas. Tamén se redactaron pequenos textos que foron analizados e comentados posteriormente. Estas actividades sinxelas aportaron un gran dinamismo e unha maior distensión na sala ao permitir a participación das persoas asistentes. 

“Estrelas no bico, na fronte un cantar”

Estíbaliz Espinosa, acompañada dun piano e de distintas imaxes que se proxectaban nunha pantalla, realizou unha actuación que resultou orixinal e interesante logrando espertar a curiosidade entre @s máis pequen@s ao emparellar a ciencia coa literatura, mías concretamente  a astronomía coa poesía. Divertida, singular e moi entretida.