Este luns 23 de Setembro Pablo Díaz achegou aos máis pequenos da Biblioteca Mª José Ruso de Dorneda os seus Cantacontos para bebés, música e contos combinados con moito tino para guiar a este público tan especial  nos seus primeiros pasos no mundo dos libros.

Este martes 24 de setembro visitaron de novo a Biblioteca uns amigos moi queridos polas nenas e nenos de Ribadeo, os ratos de Lonxedetodo coa súa artista máis internacional, a gran Lilí Gruyére, e o seu amigo, o rato Fuco.

Lilí acaba de recibir un gran encargo profesional, a dirección do musical “A ratiña presumida” pero ela decide facer unha versión un pouco diferente que por suposto vai gustar moito a todo o mundo.

Na Biblioteca os agardaba o alumnado de 2º de Educación Primaria do CEIP Gregorio Sanz

O pasado sábado 21 de setembro case quince rapaces e rapazas deron renda solta a súa imaxinación grazas ao espertar do seu lado poético que veu da man de Cristina Quiroga. Unha actividade moi interesante que deu como resultados preciosos video poemas cargados de mensaxes tolerantes.

O luns, 23 de setembro tivemos a visita do ratiño Fuco e a ratiña Lily Gruyere. Aos dous encántanlles os libros e nesta ocasión deleitáronnos coa narración dos contos Oliver Button é unha nena e A ratiña presumida que adaptaron coma unha luva  para  o tema da igualdade de xénero.

O espectáculo tivo unha acollida incrible por parte do público, tantos dos nenos/as coma dos maiores.

Todos/as  pasárono moi ben.

Foi todo un éxito.

Moitas grazas.

Escoitaron con moitísima atención a Charo os nenos e nenas de 0 a 3 anos da Escola Infantil A Rolada.

As familias Papaventos que voan polo ceo poden ser de moitos tipos, pero se algo as caracteriza é que están cheíñas de historias e de alegría. Ademais, como viaxan moito, as familias Papaventos coñecen airexas e animais do máis estraño. Contos sobre a amizade acompañados pola voz e a guitarra de Charo Pita interpretando algunha canción do seu libro disco No país do vento.

O venres 20 de setembro os rapaces e rapazas inscritos no obradoiro Búscanse valentes. Inspiración poética crearon verdadeiras xoias artísticas combinando imaxes e pequenos poemas nos que apreciamos reflexións ben interesantes.

Contacontos interactivo no que a través do conto sobre igualdade de xénero, Daniela Pirata, teremos que superar 7 probas para converternos nuns auténticos piratas. Ao finalizar e obter o desexado tesouro, teremos que enfrontarnos có Capitán que non permitirá que as nenas sexan piratas no seu barco. Na actividade, xogaremos, cantaremos, bailaremos, pintarémosnos e loitaremos contra a desigualdade.

A Biblioteca de Vilanova de Arousa acolleu, o pasado venres 20 de setembro, un espectáculo destinado a facer conciencia entre os máis pequenos de cuestións de igualdade entre xéneros.

Manuel Solla (Expresión Producións) transmitiu estes valores a través de contos, trucos de maxia e a participación dos asistentes.

O venres 20, visitounos o carteiro de augasclaras. Trouxo cartas para nenos que asistían ao contacontos que enviaban personaxes de diferentes contos : Rosa caramelo, Artur e Clementina e María. Aos nenos gustoulles moito os escenarios montados para os distintos contos.

O pasado día 14 de setembro celebramos “O día do neno” encadrándose dentro da programación de Festas Patronais da nosa vila. Ademais de outra serie de actividades dirixidas a todos os públicos, co programa Ler Conta Moito puidemos levar a cabo a representación do espectáculo de títeres “Pinocho” para os máis pequenos. A actividade resultou ser un éxito, posto que debido á gran afluencia de público, a biblioteca municipal quedouse pequena e a obra tívose que transladar ás inmediacións da mesma.