O 18 de xullo achegouse á Escola Infantil do Pereiro de Aguiar, Pablo Díaz, quen coa súa voz e distintos instrumentos como a guitarra ou a frauta, amosoulle aos nosos nenos e nenas unha divertida maneira de “cantar” os seus contos favoritos. Sen dúbida foi unha sesión divertida e relaxante da que os máis pequenos gozaron moito.

Hoxe comezamos un ano mais as actividades do programa Ler conta moito 2019 coa visita de Atenea García de Xarope Tulú e o seu espectáculo ” Bichocas”.

Estrearon o programa os nenos e nenas da Galescola de Allariz.

Un espectáculo que mestura narración oral e música,  cunha gran profesional coma Atenea  que os deixou a todos e todas abraiados .

Pasámolo moi ben!

O venres día 5 tivemos unha sesión de contos na biblioteca de Covelo para os nenos da escola infantil. Migallas Teatro fixo pasar un rato ameno e moi divertido  ós cativos e pais, cos seus contos e múscia en directo.

Continuando coas celebracións do Día da Biblioteca, o xoves 25 de outubro visitounos Xiada Sanlés para buscar o vento na Biblioteca Municipal Os Templarios.

Xiada representa a Tareixa, que anda a ver onde está o vento, pois o que máis lle gusta no mundo é xogar cos seus muíños de vento e como non hai vento, deixaron de xirar.

Cunha estructura encadeada, uns personaxes van levando a outros na procura do vento. Tareixa pregunta polo vento primeiro a unha formiga, que non ten nin idea, pero dílle que quizais a flor o saiba. Aparece unha vistosa Flor e tampouco sabe onde está o vento. Dille a Tareixa que seguro o León o sabe… Despois o Rato Suso, a Bolboreta Lareta, o Barquiño, o Peixe Namo…Así ata que se atopa co Paxaro Navarro que a levará ata as nubes e será Nube quen lle explique por que non hai vento.

Con cada personaxe que aparece canta unha canción onde participa o público infantil e adulto, con retrousos pegadizos e sinxelos.

Excelente actividade para ofrecer a grupos de 0 a 3 anos. Magnífica posta en escea, chea de colorido, música, baile, narración oral, coñecemento, ecoloxía…

Os muíños de Tareixa acaban voando…Aparece de novo o vento e cantamos a canción de que todo vai cambiar, a contaminación acabarase e o vento seguirá a soprar…

Xiada Sanlés, extraordinaria profesional e voz prodixiosa.

Onte celebramos o “Día da Biblioteca” cos bebés de 0 a 3 anos. Recibimos a visita de A banda de Cornelia que nos trouxo un concerto cheo de música e contos cos que cantamos, bailamos…

As familias pasaron unha tarde moi divertida!!!

O pasado venres 19 de outubro puidemos gozar en familia dun contacontos – taller de intelixencia emocional a través do conto O monstro de cores de Anna Llenas.

As familias con nenos e nenas de 0 a 3 e de 4 a 8 anos traballaron as emocións como a alegría, a tristeza ou o medo a través de xogos combinados con dinámicas de participación grupal.

Primeiro visitamos a axencia de lectura municipal e despois divertímonos da man de Donde viven los cuentos.

O martes 16 de outubro e seguindo coa nosa programación do Mes das Bibliotecas, tivemos os “Contos do chupete” da man de Migallas Teatro na nosa biblioteca onde o pasamos de rechupete. Foi unha sesión de contos para bebés na que se integraron música en directo, literatura infantil, expresión dramática e tradición oral.

Foron moitos os bebés que xunto con pais e nais quixeron pasar unha tarde tenra e familiar, e disfrutar cantando, tocando palmas e facendo sons. Non hai máis que ver as súas caras de disfrute 😉

E como parecía que non lles chegaba a sesión 🙂 , Bea e o seu compañeiro ofreceron unha derradeira no exterior da biblioteca aproveitando a boa tarde que quedou. Alí, xa libremente, os cativos que non tiveron que marchar, achegáronse a tocar os instrumentos musicais e disfrutaron un bo anaco.

Moitas grazas a Migallas Teatro por esa tarde tan familiar e  divertida. Un pracer teros connosco e ata outra!

O día 10 de outubro tivemos un contacontos para bebés, a cargo de Charo Pita. Coa música, cancións e instrumentos, foi contando e cantando contos para os máis pequenos, cos que desfrutaron tamén os maiores.

O día 5 de Outubro tivemos na nosa biblioteca a Charo Pita, coa súa actividade Dondondirindonga e Dondondirindon, son dúas campás que viven no alto dunha torre. O mundo todo coñece o seu cantar, pero un día as campás enmudecen. Quen será capaz de devolverlles a voz?

Vai contando a historia con distintos libros, instrumentos, e sons os nen@s estaban encantados. Gustou moito.

O venres , 5 de octubre, desfrutamos dunha tarde marabillosa con Bea e Manuel.

Os contos, a música e a tradición oral deixaron engailados aos nosos/as pequeniños/as e por suposto as súas nais e pais.

Foi todo un éxito.