O pasado mércores, día 23 de Outubro, estiveron en Darbo María Faltri e Jorge Juncal co seu espectáculo “Fantasía Musical”.

Foi un concerto moi ameno, con temas de distintos xéneros musicais. Nenos e nenas divertíronse cantando, bailando e xogando coas letras do abecedario. Un estupendo peche do programa Ler Conta Moito deste ano.

O xoves 24 de outubro ás 12:00 horas na Casa da Cultura o alumnado de infantil dos colexios de Neda poideron gozar da visita de Pablo Díaz e o espectáculo “TIC TAC TOC canta comigo” baseado no seu cuarto libro disco. Foi unha sesión moi animada e as nenas e os nenos pasárono xenial.

Teatro en Punto estivo en Láncara coa sua actividade de divulgación do coñecemento “O PC non é un ordenador”. Grazas ás dúas actrices-relatoras puidemos coñecer o concepto de Patrimonio Cultural, tanto material como inmaterial, a estar atentos ao noso redor e a poñelo en valor.

Petróglifos, mámoas, asentamentos e unha ponte romana, escudos, igrexas de diferentes épocas, persoeiros ilustres… Láncara é moi rica en patrimonio cultural. Se abrimos os ollos e facemos as preguntas adecuadas, contribuiremos a que perdure no tempo o xa herdado grazas aos nosos devanceiros. Os cambios están nas mans das nosas crianzas e mocidade, pero tamén conservar e legar de novo o patrimonio e tradicións.

“Un día de treboada” foi a primeira historia escollida pola contacontos para introducir ás crianzas nas dúbidas relativas a roles e estereotipos habituais en relación ao mundo laboral e a igualdade. Nenas e nenos participaron activamente xa que se sentiron identificados por eses personaxes do rural e algúns presumiron das mamás que conducen tractores e dos papás que cociñan na casa.

Co conto “Daniela a pirata” de novo se formularon dúbidas relativas aos papeis asignados a mulleres e homes na sociedade. Con moitos voluntarios por quendas, déronlle vida a Daniela, ao Capitán Orella Cortada e a toda a tripulación a modo de pequena obra de teatro improvisada. E ao final… Ben… Se queredes coñecer o final, teredes que pedir o libro na vosa biblioteca!

Vivimos unha sesión de contacontos emocionante e participativa onde se demostrou que nenas e nenos nunca nos deixarán de sorprender coas súas respostas.

Iolanda Eiras e Camilo Seira transportaron aos nenos e nenas participantes o pasado 23 de outubro no taller “A árbore calada” a un mundo ancestral, onde todos os seres que habitan a Terra falan e onde se atopa unha árbore que cala.

Un espectáculo fermoso de teatro de sombras onde se combinou a narración oral, a música tocada e cantada e a escultura en directo a través do noso artista local Camilo Seira.

Incluiu un obradoiro plástico onde modelou Camilo en barro, previo debuxo realizado de todas as nenas e nenos.

Xoán Curiel fixo pasar uns momentos moi emotivos en Rois, a través da música e da poesía. Grazas desde a biblioteca de Rois por facernos gozar da forza das verbas e das melodías!

E no Día das Bibliotecas tivemos unha representación teatral que nos ilustrou de xeito ameno e pedagóxico a historia das civilizacións: dende o Xurásico ata a Idade Contemporánea. Poidemos coñecer a Lucy, a primeira homínida descuberta en Etiopía; ao home das cavernas que habitou o noso planeta no Paleolítico; ao faraón Akenatón buscando a Nefertiti e as súas escravas da civilización exipcia; ao rei do Medievo, a labrega que traballaba para el e a unha marabillosa princesa que coñeceu na biblioteca; a Leonardo da Vinci do Renacemento; e por último a Neil Armstrong, austronauta estadounidense, que foi o primeiro ser humano que pisou a lúa na Idade Contemporánea.

Onte pasamos unha tarde divertidísima con Leo Leiño: maxia, humor, libros, moitos efectos especiais e ata neve tivemos na biblio!

Así da gusto celebrar o Día das Bibliotecas!

Moitísimas grazas a Leo pola súa visita, seguro que virá de novo moi pronto!

Na tarde de onte, coincidindo co día das bibliotecas, visitounos Larraitz, para falarnos do contexto histórico dos anos en que Antón Fraguas era un neno, e de como se divertía este neno cos medios de que dispoñía na súa casa e na súa infancia, mostrounos como se facían os xoguetes naquela época, con panos, cordas,  elementos da natureza: mazarocas, carozos de millo, paus, palla, etc. Un pequeno obradoiro acompañado de folclore popular de esa época con cancións xa esquencidas para moitos..

A continuación,una divertidísima sesión de títeres, a historia de Dona Barriga Verde, unha pícara pandereteira que armada de inxenio desafía as dificultades cotiás, vencendo ao medo e ás inxustizas defendendo á súa integridade e amor propio fronte aos monstros, ao amor, á morte e ate ao mesmísimo demo.

E chegou Paula Carballeira a salceda chea de libros e historias que narrar e contar.

Fixo as delicias de tódolos alí presentes que  pasaron un bo rato de aventura diferente.