Fermoso espectáculo narrativo e musical que trascende as xeracións e na que o público máis pequeno participou activamente creando unha tarde máxica.

Con motivo das Letras Galegas visitáronnos Cris e Jean. Os rapaces e rapazas que viñeron celebrar na biblioteca este día tan especial aprenderon o funcionamento da imprenta e elaboraron un fermoso fanzine sobre a vida e obra de Florencio Delgado Gurriarán.

O venres 10 de xuño a Biblioteca pública municipal “P. M. Martínez Ferro” estivo chea de familias que viñeron á actividade de contos e maxia do Mago Paco. Como é habitual cando nos visita houbo moita participación da rapazada que non quixo perderse esta fantástica proposta que lles fixemos desde a biblioteca municipal e onde a diversión estaba asegurada.

Os Monicreques de Kukas representaron en Lugo a súa obra “Xan Perillán e a maleta máxica”. O protagonista, Xan Perillán, contou coa axuda da rapazada para organizar a súa viaxe a Pernambuco. Unha organización que resultou do máis divertida para pequenos e maiores.

Un espectáculo de gran calidade!

O venres 3 de xuño, o Centro Cultural Xaime Illa de Raxó, acolleu o espectáculo ‘Trispilistriñas’, con cantos, contos e tradición oral da man de Pavís Pavós.

Trispilistriñas trispilistriñas,
o que non come non ten barriguiña,
trispilistrolas trispilistrolas,
o que non come non ten barrigolas!

En BIBLIOPAZOS continuamos coa programación educativo-cultural de animación á lectura e para conmemorar o DÍA DAS LETRAS GALEGAS que se celebrou o día 17 de Maio, tivemos con nós á actriz e contadora SABELA GAGO quen nos trouxo o seu espectáculo de contacontos “MALETAS VIAXEIRAS”.

A actividade tivo lugar o VENRES DÍA 3 DE XUÑO ás 13:00 horas no Auditorio do Concello de Pazos de Borbén, e estivo convidado para asistir ao mesmo o alumnado de Infantil do CPI “Curros Enríquez” de Pazos; da EEI “A Galeriña” de Nespereira; e os usuarios da Asociación ASPAVI.

Maletas de distintos tamaños e formas estimularán a imaxinación do público para guialo por países inventados e reais, fantásticos e universais. Mergullarémonos no mar e pasearemos por París ata chegar á muralla chinesa. Fomentaremos a lectura coa teatralización, nun constante xogo de interacción cos nenos e nenas, e acompañaremos á ratiña Sofía na súa viaxe polo Universo para descubrir quen é o ser mais poderoso do Mundo.

Unha estupenda actividade na que Sabela Gago soubo ter entretidos e atentos aos participantes en todo momento e que estos participaran moi activamente do espectáculo.

Trémola Teatro estivo o venres 20 de maio na Biblioteca Municipal de Ordes. “A nena que se comía os contos” resultou ser unha historia marabillosa e divertida. O público con ganas de repetir. O grupo magnífico! Facendo biblioteca!

OQO achegou á biblioteca do Grove o seu espectáculo “Contos da Leiteira” con varias historias de empoderamento femenino, ás veces con mulleres de carne e óso, e outras, representadas por animais; como a galiña do conto “O galo traganoces”, outras veces con marcados clixés e tradicionalismo; como no conto “A máscara do león”, que agocha unha crítica a todos aqueles que viven as súas vidas conforme ao que os demais agardan deles.

“Os contos da Leiteira” no Grove

Tamén alertaron das dificultades de alcanzar algo tan esencial como é a identidade persoal, o recoñecemento a ser un mesmo.