O pasado martes 19 de maio, tivo lugar o contacontos O SOÑO DO RATO con Olga Abad “Intres” na Axencia de Lectura Municipal de Areas (Ponteareas), que nos trouxo moitas historias sobre ratos, ratiñas e gatos. Contounos a historia do rato César que soñaba cos trens, a rata Lavandeira que lavaba a roupa de todos os ratiños do pobo e da gata Renata que non medraba… historias ilustradas con sombras chinesas e monicreques.

O venres, 22 de maio, tivemos a Manuel Solla na nosa biblioteca contándonos contos sobre animais que tiñan poderes, ratos de biblioteca ou libros que, por arte de maxia, enchíanse de debuxos.

A actuación foi moi participativa facendo interactuar aos nenos e nenas que gozaron co espectáculo.

O venres 22 de maio, na biblioteca de San Pedro de Nós, asistimos a unha clase maxistral  de Contacontos da man de Pablísimo.

Cunha habilidade increíble, conseguiu arrancar as gargalladas de grandes e pequenos.

A posta en escena estivo moi ben traballada : instrumentos musicais moi orixinais, cantar de cego ilustrado con viñetas, xogos coas letras…

Ademáis de divertida, a actividade resultou moi enriquecedora para o público asistente xa que introduciu partes da literatura tradicional como a literatura de cordel que de seguro que as rapazas e rapaces non coñecían.

Co gallo da celebración do día da Diversidade cultural, o pasado 21 de maio, na Biblioteca Pública Municipal de O Carballiño tivo lugar a contada de “Irene en Oriente Próximo” enmarcada dentro da programación de Ler conta moito 2015. Con este conto, os artistas ensináronnos os costumes de distintos países de Oriente próximo, como o Libano, Jordania ou Palestina…. e tamén nos amosaron as especias máis empregadas, a area do deserto..

O público foron nen@ con idades comprendidas entre os 5 e os 11 anos, que quedaron moi sorprendidos de poder ulir as especias, tocar a area…

Gracias a Solidariedade Internacional de Galicia por esa máxica sesión de contacontos do mundo para un día tan especial para Galicia como é o día 17 de maio.

Hoxe na biblioteca de Covelo, visitounos Marisa Irimia coa narración de contos para os máis cativos, os nenos de 1 a 3 anos da escola infantil de Covelo. Os pequenos disfrutaron coas historias e relatos de Marisa durante 45 minutos e non querían voltar para o seu cole. ¡Boa sinal!.

Bibliioteca P. de Covelo

A maleta da avoa está chea de pequenos tesouros. Nela vive a memoria entre libros, bonecas de millo, chapeus… e tamén adiviñas. Velaí unha: Redondo como o pé dun cabaliño, ten cen mil follas e non as conta ninguén. Que é? A resposta agarda na vosa biblioteca.

A Tripulanta Rías Baixas e o Tripulante Norai son dous investigadores mariños que teñen distintas hipóteses para dar explicación á orixe do sal na auga do mar. El cre as teorías científicas pero ela fai máis caso dunha lenda cuxos protagonistas viviron hai moito tempo nas proximidades da biblioteca onde se celebra o espectáculo. Tras representar a lenda, os dous tripulantes organizan unha grande expedición aos fondos mariños levándose consigo a todo o público e facéndoos partícipes de importantes descubrimento. Nenas, nenos e maiores disfrutaron a tope dunha boa narración oral teatralizada e da expedición aos fondos marinos nos xardíns que rodean ao edificio onde se ubica a biblioteca, onde puideron observar cabaliños de mar, peixes que emitían luces para poder nadar nos fondos mariños, mantas raia… para despois comprobar cientificamente o proqué da salinidade do mar na exposición de    libros sobre o mar.

O pasado 14 de maio na Biblioteca Ágora celebramos dunha forma especial o Día das Letras Galegas, data simbólica na que poñemos en valor como pobo o feito de contarmos cunha identidade, cultura e lingua propia. A forma escollida desta volta foi unha sesión de narración oral que desenvolveu Avelino González para os nenos e nenas de 6º de EP do CEIP San Pedro de Visma.

O recoñecido actor galego de teatro, cinema e televisión conseguiu captar toda a atención dos asistentes coas súas historias dramatizadas, cun pé no real e outro no ficcionado. Para alén da súa capacidade de envolver con palabras aos mozos e mozas, quixo tamén facelos partícipes das historias interaccionando con eles en diversos momentos da sesión.

A actividade resultou un verdadeiro éxito, tanto polo dinamismo e viveza coa que se desenvolveu como pola propia valoración dos alumnos e alumnas asistentes.

O pasado venres 15 de maio, dentro do programa Entre arrolos e contiños que mensualmente organizamos na biblioteca, contamos coa presenza de Bea Campos e Davide González nunha nova sesión dos Contos do Chupete!

Foi unha tarde do máis divertida, como sempre chea de contos e música que fixeron gozar aos máis pequenos da biblioteca!

Entre arrolos e contiños. Os contos do Chupete
Próxima sesión: venres 19 de xuño | 18h
*Inscrición a partir luns 1 de xuño a partir das 17.00h