A Biblioteca Central de Cambre acolleu onte, mércores 19 de outubro, unha divertida sesión de maxia para todos os públicos, a cargo do Mago Teto. Co obxectivo de espertar o interese pola arte da maxia, o espectáculo ‘4500 Anos da incrible historia da maxia (Parte 1 e 2)‘ repasou as fantásticas e sorprendentes historias do xénero, acompañadas coa realización de xogos de magos doutros tempos e a explicación  dalgúns dos mellores trucos de maxia da historia. De xeito complementario, a biblioteca realiza estes días unha exposición dos seus fondos bibliográficos sobre o asunto.

Ler máis →

O xoves 6 de outubro, a Biblioteca Municipal Os Templarios, acolleu a actividade Contos de Chuches Amil. 

Fran Amil ofreceu unha divertida sesión de contos procedentes dos seus disco-libros “Un conto ao revés” e “Monstros. Con ou sen consentimento”, ilustrada coas súas propias cancións.

Ler máis →

Na tarde do mércores 5 de outubro a Biblioteca Municipal Central de Cambre contou coa presenza de Yolanda Castaño. Esta recoñecida escritora bosquexou para o público asistente a súa peripecia profesional, os obstáculos, prexuízos e conflitos que viviu na súa determinación de ser Muller, poeta, en galego e… Polo mundo!

Unha charla moi amena que ilustra a necesaria loita de emancipación feminina desde o celme mesmo da nosa literatura.

Ler máis →

Este xoves, 29 de setembro, a Biblioteca Municipal Os templarios de Cambre acolleu ‘Que animaliño é?’, un divertido espectáculo de Trémola Teatro. Os bebés e as súas familias puideron gozar dunha sesión que mesturou teatro, música, danza e mesmo burbullas, creando un fermoso espectáculo sensorial que estimulou os sentidos de todas as persoas participantes.

Ler máis →

Na tarde do mércores 28 de setembro tivemos unha visita moi especial na Biblioteca Municipal Central de Cambre. Antes de comezar coa actividade de animación á lectura, un barrendeiro que pasaba por alí chamounos a atención sobre a importancia de non botar cousas ao chan para despois enredarnos a todas as persoas participantes cunha chea de divertidas anécdotas e contos ambientais.

O espectáculo ‘Miña casa, meu lar (contos ambientais)’, da man do narrador oral Caxoto, ademais de facernos rir e participar en distintos xogos, fíxonos pensar sobre a necesidade de coidar o noso entorno para que el nos coide a nós.

Ler máis →

Na tarde deste venres, 23 de setembro, a Biblioteca Municipal Xabier P. Docampo de Cambre acolleu a actividade de animación á lectura ‘Cinema Marabillas. Ver para ler!’ da man de Raquel Queizás.

Nesta sesión tivemos a oportunidade de achegarnos á lectura dun xeito atractivo e divertido, a través da proxección de fragmentos das primeiras adaptacións cinematográficas de cine mudo inspiradas nos contos marabillosos e nos libros clásicos da literatura. Polgariño, Alicia no país das marabillas, Peter Pan, O mago de Oz… O cinema tamén se le.

Ler máis →

Na tarde do mércores, 21 de setembro, a Biblioteca Central de Cambre acolleu unha divertida sesión de títeres. A función, a cargo de Mircromina Teatro de Títeres reuniu ao público asistente arredor da historia de Raio the Loubican, metade lobo, metade can, un interactivo espectáculo de títeres no que un can faise coa atención das nenas e nenos contando a súa historia de superación e aprendizaxe.

Ler máis →

A Biblioteca Municipal Xabier P. Docampo de Cambre acolleu este venres, 16 de setembro, o espectáculo “O paroleiro” a cargo da compañía Os Contos de Pablísimo. O paroleiro, apoiandose en distintas técnicas e estilos, enredou ao público infantil e familiar cun feixe de divertidas historias, ofrecendo unha sesión memorable.

Ler máis →

A rapazada de Cambre recibiu este xoves 15 de setembro -ás 17:30 horas- a visita do Principiño para abrir a programación de actividades de animación á lectura deste curso que comeza.

A sesión, realizada na Biblioteca Municipal Os Templarios, consistiu nun contacontos teatralizado, a cargo de Raquel Galavís. O Principiño en Madagascar combina a narración oral coa proxección de pezas documentais que introducen a nenas e nenos na cultura malgaxe, na paisaxe e nas vicisitudes das xentes daquel país. A tenrura das súas historias logrou contaxiar a todas as persoas presentes, convidando á emoción da lectura.