Unha divertida sesión de contos, a cargo de Marisa Irimia,  gozaron os bebés de Moeche o sábado, día sete, ás once e media. A espléndida e luminosa mañá, animounos a saír á zona exterior da Biblioteca Pública Municipal

Obradoiro co método Zentangle no que un grupo de maiores, necesitados de estimulación terapéutica, decoraron un poema desenvolvendo, por medio desta técnica, a súa creatividade, a tranquilidade interior e a concentración.

Un ano máis, decidímonos por un obradoiro con este método  como instrumento,  pois é sinónimo de calidade á vez que de magníficos resultados conseguidos a través das diferentes propostas. Ademáis do nomeado anteriormente ( a creatividade, a relaxación, a concentración ) os participantes  ven aumentada a súa autoestima ante as obras resultantes.

Magnífica actividade dirixida, con calidez e profesionalidade, por Elisabeth Hillerud (Zengoala)

Alumn@s de 2º e 3º ciclos do C.E.I.P. de Moeche pasaron un bo anaco da mañá do día 29 de setembro aprendendo a redactar, locutar, gravar e editar un podcast. Con técnicas de locución, teatro e dobraxe. Lectura inerpretativa, modulación de voz, vocalización e locución. Todo o cal lles resultou do máis interesante e ameno.

Os participantes do obradoiro de memoria da Biblioteca de Moeche, o día 15 de setembro gozaron da proxección do documental “Cardoña, fotos a 7 pesetas”, que os transportou aos anos da súa xuventude, o que deu lugar a un animado coloquio posterior no que xurdiron as lembranzas de xuventude e rememorando datas sinaladas e divertidas anécdotas e chascarrillos. Unha tarde para lembrar.

O pasado venres día 9 o mago David Méndez presentou o seu espectáculo “A óptica das ilusións” aos usuarios e usuarias da asociación ASPROMOR.

Pasamos unha mañá chea de maxia e diversión.

Nesta ocasión achegamos a narración oral ao Centro de Atención a Persoas Maiores de Ortigueira. A contadora Alba Grande relatou varias historias recuperadas da tradición oral e logo convidou aos asistentes a presentarse e contar relatos ou contos que souberan. Para rematar votaron unhas cantarolas e así pasou a mañá.

O pasado 18 de maio Ignacio Vilariño visitou As Pontes co seu espectáculo “A viaxe de Ramón Sanfiz”. Foi un pracer escoitar os contos da viaxe, as cantigas e romances e revivir con el o personaxe de Francisco Fernández Del Riego. Especial ilusión nos fixo o conto sobre O flan chino mandarían, a boa conta que o seu artífice foi o pontés, José Ferro. Moitas grazas Ignacio por facernos pasar unha tarde tan divertida.

Unha mañá chea de maxia con David Méndez para os usuarios e usuarias da Asociación Pro-Minusválidos do Ortegal (ASPROMOR).

O Día Internacional da Lingua de Signos tivemos un contacontos moi especial na biblioteca. Moitas grazas, ContAZ

Para celebrar o inicio do curso escolar o pasado venres 16 de setembro estivo con nós en Pazos de Borbén PACO CERDEIRA “PAKOLAS“ acompañado de RAMONA ÓRBITA coa súa máquina do tempo coa que nos fixo viaxar ao futuro e ao pasado para procurar tecnoloxía que nos permitira crear un mundo mellor, máis ecolóxico e con enerxías limpas.

Con boa música e excelentes cancións interpretadas por Pakolas viaxamos á prehistoria onde coñecemos a Manolo Cavernario e xantamos churrasco de mamut; visitamos a Leonardo Da Vinci no Renacemento; estivemos tamén co faraón Ramsés en Exipto e visitamos moitos mais lugares onde descubrimos moitas cousas interesantes.

Estivo con “Ramona Órbita” e “Pakolas” todo o alumnado de Infantil e Primaria do CPI “Curros Enríquez” de Pazos e da EEI “A Galeriña” de Nespereira, ademáis dos usuarios da Asociación ASPAVI acompañados dos seus mestres e monitores; e podemos garantizar que todos os asistentes o pasaron moi, pero que moi ben.

Aquí vos deixamos unhas imaxes do evento.