Unha tarde, a de onte na axencia de lectura de Vilariño (Cambados), chea de historias sobre mulleres invisibilizadas ao longo da historia. Reflexionamos e aprendemos unha morea sobre igualdade da man de Ana Hermida.
Este xoves día 11 tivemos na Biblioteca Rego da Balsa a Olga Brañas, que nos ofreceu o seu espectáculo “Cinema e música con Buster Keaton”.
Nel, Olga acompañaba co seu piano un dos filmes máis coñecidos de Buster Keaton, Sherlock Jr., e resultou ser unha actividade do máis orixinal e inspiradora, ademais de facer unha gran labor de difusión das artes cinematográficas.
Os asistentes saíron moi satisfeitos do noso auditorio.
Por medio dun entretido e divertido formato de concurso televisivo interactivo, o pasado sábado, adolescentes de Moeche tiveron ocasión de identificar comportamentos que conducen á violencia machista en elementos cos que se relacionan diariamente, como son: a música, a publicidade, as redes sociais…
A Biblioteca de Parada de Sil acolleu este venres, 30 de agosto, a iniciativa “Cociñando a igualdade” en dúas sesións: de mañán ás 12:00 Am e de tarde ás 17:30 PM. Estas actividades enmárcanse dentro do programa Ler conta moito.
As dúas actividades, na que participou un público moi variado tanto cativos/as como pais/nais e avos/avoas, tivo como obxectivo analizar e reflexionar a través da cociña sobre os roles do home e a muller, e a importancia da incorporación da muller aos ámbitos científicos e tecnolóxicos.
A equipa de Ceo Aberto nos ensinou a maxia química que pode converter o yogurt nunha bomba que estala ao metela no boca…con diferentes líquidos conseguimos texturas totalmente diferentes…xogando coa maxia de converter o sólido en líquido…o líquido en gaseoso…
Grazas Ceo Aberto polo ben co pasamos grandes e pequenos!!!
Grazas a tódolos que nos visitástedes e participastes nas duas actividades na nosa biblioteca!!!!
Día 5 de xullo de 2019 ás 12:00, na biblioteca de Escairón
Hoxe en día os podcasts están na picota. E na biblioteca preparámonos preparámoste para estar á última: imos facer un podcast! Aprendemos a escribir e guionizar, a interpretar, a locutar e a editar un podcast!
E despois só hai que subilo á nube…
da man de Damián Alonso de Solovoz
o 5 de xullo, ás 12:00 na sala infantil
tivemos este obradoiro totalmente práctico, no que en apenas 2 horas aprendemos a:
O primeiro foi descobrir que é un podcast e como naceron.
Despois vimos a importancia de vocalizar, a necesidade dunha correcta respiración e como proxectar ben a voz.
Logo de facer varias prácticas de narración de diferentes tipos de textos, pasamos á parte práctica máis divertida: gravarnos e editar o noso podcast!
Sorprendente como pode cambiar o que dixemos e como o dixemos unha vez editado:
podemos parecer máis xoves, falar máis rápido, facer coma se estiveramos nunha cova,… os efectos que lle podemos poñer á nosa voz son alucinantes. En canto poidamos, subiremos o resultado do noso obradoiro.
O noso alucinante profe, Damián Alonso, conta con experiencia como actor de dobraxe (en documentais como Amish Mafia ou American Chopper, ou na serie Turbo Fast, dándolle voz a Tito, o vendedor de tacos), actor de teatro e formador. Guionista e creador de “cachosdesqueches” e voz de Click Clack en Dinotrux entre outras. Máis de 150 obradoiros e cursos impartidos por toda Galicia no que o punto de encontro é a voz. Obradoiros de radio, podcast, falar en público, comunicación e lectura interpretadada e teatro.
Os alumnos de 1º da ESO dos institutos de Sada desfrutaron con este obradoiro cheo de humor no que realizaron eles mesmos a dobraxe dunha película con guion especialmente creado para a ocasión.
Manuel Pombal e Suso, grandes profesionais do mundo da escena, comezan dramatizando todos os pasos da elaboración dunha película, de forma amena e divertida ata introducirnos no mundo da dobraxe e converter a biblioteca nun verdadeiro estudio.
Van mostrando a través de imaxes a importancia do son nun filme, dos diálogos e, como non, dos diálogos no propio idioma, que os poidamos entender.
Visualizamos escenas noutros idiomas, ou sen son,… ata que aparecen dobradas ao galego.
Tamén representan escenas en vivo que logo aparecen gravadas en imaxes…
Ao longo do obradoiro os propios participantes van gravando, dobrando ao galego, por grupos de tres, os diálogos escritos e divididos en “Takes”, as distintas “tomas” dun filme.
A actividade desenvolveuse con dous grupos de idade:
Un primeiro grupo para nenas e nenos entre 8 e 11 anos e un segundo grupo para xoves entre 12 e 16 anos.
Para o grupo de menor idade, foi a dobraxe dun trailer da serie de debuxos animados, Bob esponxa.
Para o grupo de maiores, un trailer da película Crepúsculo.
Actividade que resulta moi atractiva para os participantes ao tratarse dun obradoiro participativo e pouco frecuente.
Altamente recomendable para realizar na biblioteca.
Actividade interdisciplinar, moi interesante e orixinal. Lectura, expresión plástica, fotografía e traballo en equipo conforman estes obradoiros.
Póñense en relación dous mundos: cinema e literatura.
É unha actividade organizada en catro sesións. Na primeira comezase cunha introducción á técnica de animación do Stop Motion (foto a foto) e cómo o cinema e literatura están máis unidos do que parece. Con todos os conceptos claros, as/os participantes comezaron a traballar en dous proxectos de curtametraxes diferentes, con historias sacadas de libros infantís.
Durante todas as sesións foron creadores en todas as fases, dende o deseño e creación dos personaxes e escenarios, á adaptación dos guións, pasando pola realización de fotografías e a dobraxe.
Todo o proceso moi ben desenvolto por Minia Regos. O resultado é impresionante e ademais cada participante leva gravada a curtametraxe na que participou.
O xoves 26 de outubro chegaron á biblioteca de Lorbé Don Renato e Piruleta, que nos trouxeron a súa Biblioteca Máxica e nos aproximaron á figura de Gloria Fuertes de un xeito engaiolante no que houbo de todo: música, maxia, humor, monicreques, malabares, teatro de sombras, proxeccións…todos estes recursos teñen cabida na Biblioteca Máxica, que resultou unha actividade que namorou a grandes e pequenos.
Celebramos o Día da Biblioteca en Camariñas con Vicente Mohedano e o seu show de divulgación científica “Cando o sol se deita”. O resultado foi moi satisfactorio, os contidos elaborados, boa resposta do público asistente, espectáculo divertido e instructivo.
Séguenos