O martes 14 de outubro estivo na nosa biblioteca Teatro Calavera co seu espectáculo “O cociñeiro Antón e a pasteleira Tomasa”. Unha actuación moi divertida  que escenificou a historia de amor entre o cociñeiro e a pasteleira , enmarcada nun magnífico decorado que encantou  aos asistentes.

A sesión rematou cun obradoiro de decoración de pasteis con pasta fondant, no que nenas e nenos se convertiron en “virtuosos da  repostería” por un día… Foi todo un luxo culinario!!!

O pasado día 1 de outubro , a rapazada da Biblioteca de Pastoriza “Miguel Sande”, participou activamente na actividade levada a cabo con Eduvía.  A través do xogo fixeron un repaso das distintas linguas do noso planeta.

Babaluva Teatro achegouse o día 8 de outubro ata a Biblioteca Municipal de Monforte para traerlles froitas e verduras ós rapaces e rapazas, e amosarlles a cantidade de cousas que se poden facer con elas  .

Descubriron as posibilidades artísticas de leitugas, repolos, castañas…..e cada un sacou o artista que leva dentro.

Pasáronno moi ben e quedaron con ganas de repetir o ano que vén.

O día 7  de outubro tivo lugar este obradoiro de 100 minutos de duración dirixido á infancia de 4 a 11 anos. coa intervención de dous integrantes de Maumarela.

Constou de dúas fases, na primeira fíxose a proxección de imaxes do proceso de fosilización dos dinosauros, acompañadas de explicacións axeitadas ao tramo de idade dos participantes, na segunda as crianzas fixeron cadanseu fósil para levar á casa. Utilizouse plastilina, xeso, area e auga, así como figuras de dinosauros que entusiasmaron á rapazada.

Unha actividade  realmente interesante e moi ilustrativa.

Obradoiro impartido polo debuxante MANEL CRÁNEO.

Destinado a nenos e nenas de 6 a 10 anos.
Lectura de dous libros do Diario de Pichük con ambiente sonoro en directo. Buscouse  aprender e practicar a creación de personaxes e mundos imaxinarios a través do debuxo e as palabras. Fabricáronse  chapas que cada neno/a levou para a casa.

A xenial ilustradora Noemí López achegouse á axencia de lectura de Chapela para instruir aos rapaces nas pautas básicas para debuxar.

A proposta centrouse na representación de personaxes. Noemí foi conducindo aos rapaces a través do debuxo, achegándolles as nocións básicas e moitos consellos para dominar as proporcións, reproducir as emocións e expresións faciais ou expresar o movemento.

Máis no blog das Bibliotecas de Redondela: http://bibliotecasredondela.blogspot.com.es/2014/09/contando-con-imaxes-noemi-lopez-achega.html

O mércores 24 de setembro tivo lugar na Biblioteca Municipal de Monforte de Lemos un taller de marionetas de papel. Máis de vinte nenos e nenas de entre 6 e 11 anos participaron na elaboración dunha marioneta de papel.

Esta actividade tivo unha acollida moi boa, e foi altamente valorada polos nenos e nenas así como polas súas nais e pais que se implicaron na mesma.

Quedaron tan contentos que piden máis para o ano próximo.

O pasado 28 de agosto, na Biblioteca Municipal Os Rosales, disfrutamos dun obradoiro de iniciación ao manga (BD xaponesa) para rapaces a partir dos 9 anos, organizado polo estudio especializado en manga Cerditos de Guinea.

O obradoiro enmarcábase dentro da programación especial das Bibliotecas Municipais da Coruña sobre cómic, apoiando a programación do Festival Viñetas desde O Atlántico.

GoChi foi o encargado de profundizar no mundo do manga cun grupo de 11 rapaces e rapazas que xa sabía moito do tema, pasando da teoría a demostrar os seus talentos debuxando.

Dúas horas de obradoiro que se pasaron voando. Tendes máis imaxes no Flickr das Bibliotecas Municipais da Coruña.

O pasado venres puidemos gozar, na biblioteca municipal de Monte Alto, da profesionalidade e experiencia dos artistas Alberto Guitián e Leandro Barea, que nos mostraron as técnicas e recursos creativos do humor gráfico actual.

Botamos unhas risas improvisando situacións cotiás que poderíannos servir de inspiración para as nosas propias viñetas, e logo experimentamos con materiais reciclados para crear as nosas primeiras caricaturas. Unha mañá diferente e, sobre todo, moi divertida.

O pasado luns rematou a última das 8 sesións do obradoiro de teatro que realizamos con Teatro Buratini durante as actividades de verán das Axencias de Lectura e a Biblioteca en Cambados, grazas ao programa da Xunta Ler Conta Moito. Durante este tempo “O lápis máxico” permitiu, aos 16 integrantes do curso, escribir a fermosa historia “Unha estrela de verdade” , aprendendo igualmente a crear e manexar títeres.  O resultado non puido ser máis divertido e enriquecedor…

Teatro Buratini en Cambados