O pasado xoves 14 de maio, Títeres Cachirulo, grazas ao programa Ler Conta Moito, presentou en Touro o seu espectáculo de sombras “Cousas de Castelao”

A historia comeza o día que Pedro anda a marear a perdiz para non ir á escola. Buscando motivos para non asistir, vai sendo testemuña de diferentes situación sociais que se producen na vila.

Máis de oitenta nenos e nenas puideron desfrutar desta actividade, na que ao final viron como se realizaban as sombras e aprenderon a mover os personaxes que mais lles gustaran.

O martes 19 de maio na BPM “Federico García Lorca” de Montrove houbo un obradoiro de creación de marionetas de papel  a cargo de Anxo García de Viravolta Títeres.

Nenas e nenos estiveron moi atentos para poder facer as súas marionetas perfectas e, unha vez rematadas, engadirlle adornos ou accesorios da súa propia colleita. Resultou ser unha actividade moi divertida e creativa, e os participantes marcharon a súas casas encantados cos monicreques que fixeron.

Para celebrar o día das Letras Galegas Fátima Fernández veu a contarnos historias, unha onde os galos poñen ovos, logo puxémonos os lentes que fan ver o amor, coñecemos personaxes que querían ser distintos de como eran para ser recoñecidos polos demais. Rimos…cantamos…disfrutamos todos, nenos e adultos.

O venres 15 de maio, co gallo da celebración do día das Letras galegas, pais e nen@s participaron nun divertido xogo por equipos, onde as preguntas versaban sobre a figura de Filgueira.

Para celebrar o día das Letras Galegas, o día 20 tivemos na biblioteca CANTACONTOS con Raquel Galavís. Disfrutamos moito cos seus contos, cancións e bailes.

O pasado 14 de maio na Biblioteca Ágora celebramos dunha forma especial o Día das Letras Galegas, data simbólica na que poñemos en valor como pobo o feito de contarmos cunha identidade, cultura e lingua propia. A forma escollida desta volta foi unha sesión de narración oral que desenvolveu Avelino González para os nenos e nenas de 6º de EP do CEIP San Pedro de Visma.

O recoñecido actor galego de teatro, cinema e televisión conseguiu captar toda a atención dos asistentes coas súas historias dramatizadas, cun pé no real e outro no ficcionado. Para alén da súa capacidade de envolver con palabras aos mozos e mozas, quixo tamén facelos partícipes das historias interaccionando con eles en diversos momentos da sesión.

A actividade resultou un verdadeiro éxito, tanto polo dinamismo e viveza coa que se desenvolveu como pola propia valoración dos alumnos e alumnas asistentes.

As actividades da biblioteca comezaron o venres 15 de maio pola mañá cunha sesión de contacontos para os nenos e nenas do CPI a cargo de Marisa Irimia, quen lles mostrou toda a riqueza da tradición oral galega. Contos recollidos aquí e alá, contos escoitados dende nena nas sobremesas da casa dos avós, contos de animais e e contos de tema marabilloso, desenredados dende a saudade de Ramón Piñeiro; unha boa representación do xeito que ten a nosa xente de ver o mundo.

O día 18 de maio, continuando coa programación das Letras Galegas a Biblioteca contou coa actividade “Fotoconto”,  os nenos asistentes convérteronse en protagonistas dun conto, tiñan que escoller diversas palabras coas  que artellar a súa propia historia na que as súas  fotos foron as ilustracións do conto. Foi unha actividade chea de imaxinación e creatividade. Mentras os pequenos poñían toda a imaxinación as nais levaban máis dunha agradable sorpresa coas recreacións dos seus fillos.

O domingo día 17 de maio para festexar o Día das Letras Galegas, Migallas Teatro representaron o espectáculo “Merenda con pan de millo”, con narracións e cancións propias e tradicionais.

Os espectadores estiveron moi participativos cantando e bailando, tanto nenos como adultos.

A posta en escena foi sorprendente e cautivadora.

Raquel desenrolou a actividade a través de tres contos onde duendes, músicos e chivos fixeron a súa aparición.

Todo iso con música en directo.